Путин тайгад амарч, Байден шатан дээр бүдэрчээ

АНУ-ын Ерөнхийлөгч Байден “алуурчин” гэж нотлох баримтгүй гэнэдүүлэн дайрахад нь эрүүл мэндийг хүсэн ерөөж, уран үгээр хариу мэх хийгээд дэлхийн нийтээс өндөр үнэлгээ авсан ОХУ-ын Ерөнхийлөгч Владимир Путин амралтын өдрүүдийг тайгад өнгөрүүлсэн байна. Путин нь Батлан хамгаалахын сайд Шойгугийн хамт тайгаар цас туучин явган аялж, эрүүл агаарт хамт цай ууж, зургаа татуулжээ.

 Ийнхүү жүдочин Путиныг уулын энгэрт цас туучин амрах зуур АНУ-ын Ерөнхийлөгч Жо Байден онгоцны шатан дээр бүдэрч олныг гайхшируулаад авчээ. Тэрээр онгоцны шатан дээр гурав дараалж бүдэрсэн явдалд олон нийт ихэд сэтгэл зовнисон байна. Хариуд нь Цагаан ордны хэвлэлийн төлөөлөгчийн нэгдүгээр орлогч Карин Жан-Пьер нь Ерөнхийлөгчийн салхинаас болж шатан дээр бүдэрсэн гэж тайлбарлажээ. Тэрээр “Гадаа их салхитай, хүчтэй салхитай байгааг бүгд мэдэж байгаа. Би өөрөө ч шатаар өгсөж яваад золтой уначхаагүй” гэжээ. Үүнээс гадна Байден сэтгүүлчдэд мэдэгдэл хийх үеэрээ дэд Ерөнхийлөгч Камала Харрисийг “Ерөнхийлөгч КамалаХаррис” гэж хэлээд, андуурч хэлснээ ч засаж залруулалгүй үргэлжлүүлэн ярьсан явдал сэтгүүлчдийн анхаарлыг ихээр татжээ. 

 Ийнхүү Байден бүдэрч, орлогчоо өөрийнхөө тушаалд орсон мэтээр ёрлож байгаа нь түүнийг шүүмжлэгчдийн бах тавыг хангаж байгаа гэвэл онц хэтрүүлэг болохгүй байх. АНУ-ын Конгрессын гишүүн Мэтт Гаец нь “КамалаХаррис нь Жо Байдентай гар барих бүрдээ судсыг нь барьж шалгаж байдаг гэдгийг Вашингтонд бүгд мэддэг” гэж ёжилжээ.