Женев хотноо АНУ Ерөнхийлөгч Жо Байден, ОХУ-ын Ерөнхийлөгч Владимир Путин нарын уулзалт болж өндөрлөлөө. Хоёр талаас уулзалтын өмнө урьдчилан мэдэгдэж байсанчлан дэлхийг донсолгох чухал шийдвэр гарсангүй. Уулзалт хэрүүл маргаангүй, нэгнээ буруутгаж зэмлэлгүй харьцангуй тайван болж өнгөрсөн гэдгийг албаны хүмүүс онцолсон байна. Ямар ч байсан Байден Путин нар хоёр улсын хооронд дипломат харилцаагаа эргэн сэргээх алмуудыг хийж Элчин сайдуудаа буцаахаар боллоо. Түүнчлэн кибер аюулгүй байдал болон зэвсэглэлд хяналт тавих асуудлаар харилцан яриагаа үргэлжлүүлэхээр болов. Уулзалтын дараагаар хийсэн хамтын мэдэгдэлд “цөмийн дайнд ялагч гэж байхгүй, цөмийн дайныг хэзээ ч эхлүүлж болохгүй” гэж мэдэгдсэн нь одоогийн нөхцөл байдалд тун нааштай үр дүн гэж мэргэжилтнүүд дүгнэсэн байна. Учир нь сүүлийн үед өрнөдийн гол төлөв цэргийн шинжээчид Калининград эсвэл Сирийн орчим бага хүчин чадалтай цөмийн зэвсэг ашигласан бүс нутгийн шинжтэй дайн дэгдэх боломжтой талаар их ярих болсон үед ийм мэдэгдэл хийнэ гэдэг нь ямар ч байсан хоёр их гүрний тэргүүнүүд нөхцөл байдлыг эрүүл саруулаар дүгнэж байгааг харууллаа гэж шинжээчид үзсэн байна.
Уулзалтын дараа Путин хэвлэлийн хурал хийж цаг гаруйн турш сэтгүүлчдийн асуултад хариулсан бол Ерөнхийлөгч Байден урьдчилан бэлдсэн үгийг телесуфлер харж уншаад, ердөө долоохон сэтгүүлчийн асуултад хариулсан нь нэлээд шүүмжлэл дагуулав. Байден сэтгүүлчдийн асуултад хариулахын өмнө “За тэгээд бас залуусаа надад асуултыг нь сонсох хүмүүсийг жагсаалтыг урьдчилж өгсөн байгаа шүү” гэж мэдэгдсэн. Үүнд жишээлбэл “The Hill” сонины сэтгүүлч ихэд бухимдаж “За тийм дээ. Өөрийн улсдаа хэвлэлийн эрх чөлөөг хориглодог цуст алуурчин Путин сэтгүүлчдийг голж шилэлгүйгээр асуух боломж олгосны дараа чөлөөт ертөнцийн удирдагч нь сэтгүүлчдийг тохиолдлын байдлаар сонгож, асуулт тавих боломж олгож чадахгүй гэдгээ зарлачихлаа” гэж бухимдсан байна.
Путины хувьд өрнөдийн сэтгүүлчдийн тавьдаг “Америк руу кибер дайралт хийсэн үү?”, “Хүний эрхийг зөрчихөө зогсоо”, “Навальный” гэх мэт асуултад өөлөх аргагүй хариулт өгсөн байна. Байден “Би зорьж ирсэн хэргээ бүтээлээ” гэж мэдэгдээд “Бидний хооронд дагаж мөрдөх боломжтой тоглоомын үндсэн дүрэм гэж байх ёстой гэдгийг би эцсийн дүнд би Ерөнхийлөгч Путинд хэлсэн” гэсэн нь түүнийг Путинд буулт хийж хамаг байр сууриа алдана гэж эмээж байсан хүмүүсийг тайвшруулсан бололтой.
Америкийн Ардчилсан намын талын хэвлэлүүд хоёр Ерөнхийлөгчийн хэлэлцээний үр дүнг нааштай үнэлж, Байденыг цаашид амжилтад хүргэж болох замын эхэнд байна гэж магтсан. Харин Бүгд найрамдах намыг дэмжигч хэвлэлүүд нь 46 дах Ерөнхийлөгчөө өөрөөс нь хоёр дахин урт хугацаанд хэвлэлийн хурал хийсэн Путинээс сул дорой харагдаж, Путин хөнгөхөн ялалт байгуулсан мэт сэтгэгдлийг дэлхий дахин төрүүлээ гэж шүүмжилсэн байна.
Сэтгэгдэл (0)
Сэтгэгдэл бичигдээгүй байна