2021/07/25
USD 2,811

Новак Жокович 7, Маттео Берреттини анх удаагаа Уимблидоны шигшээд шалгарлаа

Н.Мичидмаа
2021/07/10

Мэргэжлийн талбайн теннисний 4 Их (Австралийн нээлттэй тэмцээн, Ролан Гаррос, Уимблидон, Америкийн нээлттэй тэмцээн) тэмцээний нэг болох зүлгэн гадаргуутай талбайн Уимблидон тэмцээний финалын шатанд өрсөлдөх теннисчид тодорлоо. 

Эрэгтэй ганцаарчилсан төрөлд Их дуулга тэмцээний 19, Уимблидоны 5 удаагийн аварга Сербийн теннисчин Н.Жокович болон Италийн залуу теннисчин М.Берреттини нар шалгарч үлдлээ. Новак Жоковичийн хувьд 2011, 2013, 2014, 2015, 2018, 2019 оны Уимблидоны финалын шатанд шалгарахдаа 5 удаад нь түрүүлж цомыг хүртэж байсан бөгөөд энэ жилийн финалд шалгарснаар 7 дахь удаагаа финалдаж байна. Харин түүнтэй өрсөлдөх Итали теннисчин М.Берреттини замналынхаа анхны Их дуулга тэмцээний финалд шалгарлаа. 

Хэрвээ энэ тэмцээнд Н.Жокович түрүүлж чадвал замналдаа хоёр дахь удаагаа зүлэг, хатуу, шороон кортыг дамнан түрүүлнэ. Тэрээр өмнө нь 2015-2016 оныг дамнан шороо, хатуу, хатуу, зүлган гадаргуутай талбайд дараалан түрүүлж байсан. Харин энэ удаагийнх бол календарын нэг жилийн дотор 3 корт дамнан түрүүлж нэгэн өвөрмөц амжилтын эзэн болно. Их дуулга тэмцээний 30 дахь финалын шатандаа шалгараад байгаа Н.Жокович түрүүлж чадах уу? 

Эмэгтэй ганцаарчилсан төрөлд аваргын төлөө Австралийн Э.Берти болон Чехийн К.Плишкова нар шалгараад байна. Австрали теннисчин Э.Берти 2019 оны Францын нээлттэй тэмцээний цомыг хүртэж байсан бол К.Плишкова замналынхаа хоёрдахь Их дуулга тэмцээний финалд шалгарч байна.


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна