Вакцинаас татгалзсан хүмүүсийн эмчилгээг төлбөртэй болгоно

Дэлхий даяар корона вирусийн цар тахлыг зогсоохын тулд асар их хүчин чармайлт гаргаж байгаа билээ. Энэ их хүчин чармайлтын дийлэнх нь иргэдээ үнэ төлбөргүй вакцинжуулахад чиглэж байна. Гэвч зарим хүн бусдын нөлөөнд автаж эсвэл буруу ташаа мэдээлэл авсны улмаас вакцинжуулалтаас татгалзаж байгаа нь энэ их чармайлтыг дэмий болгож байгаа нь нууц биш. Үүнтэй улс болгон л өөрийн аргаар тэмцэж байна. Зарим улсад тодорхой мэргэжлийн хүмүүсийг албадан вакцинжуулж, вакцинд хамрагдвал мөнгөөр урамшуулж, хамрагдаагүй тохиолдолд торгох гээд янз бүрээр л үзэж байна. Гэвч эдгээр арга тийм ч үр дүн сайтай биш байгаа бололтой. Иймд зарим улс огт өөр арга барилаар хандахаар шийджээ.

Сингапур улс нь цаашид өөрийн хүсэлтээр вакцинжуулалтаас татгалзсан хүмүүс COVID-19-өөр өвдвөл эмчилгээнийх нь зардлыг төрөөс даахгүй гэж мэдэгджээ. Сингапурт корона вирусийн эсрэг вакцин хийлгэх эрхтэй хүмүүсийн 85 хувь бүрэн вакцинжуулагдсан, 18 хувь нь сэргээх вакцинжуулалтад хамрагдсан юм байна. Гэвч Сингапурт COVID-19-ийн тохиолдолд ер тасрахгүй байгаа бөгөөд гол төлөв сайн дураар вакцинжуулалтаас татгалзсан хүмүүс өвдөж байгаа учраас ийм арга хэмжээ авчээ.

Сингапурын ЭМЯ-аас гаргасан мэдэгдэлд “Одоогийн байдлаар вакцинжуулалтаас татгалзсан хүмүүс нь эрчим эмчилгээний тасагт хэвтэж байгаа хүмүүсийн дийлэнх хэсгийг эзэлж, эрүүл мэндийн салбарт хэт их ачаалал үзүүлж байна” гэжээ.