Ховд аймагт АИ-92 автобензин 3090 төгрөг болжээ

Шатахууны үнэ Ховд аймагт огцом нэмэгдэж өргөн хэрэглээний АИ92 автобензин 3090 төгрөг болж нэмэгдсэн байна. Харин АИ92 автобензин Улаанбаатар хотод 2390 төгрөг байгаа юм. 

Импортлогчдын зүгээс шатахууны үнэ чөлөөлөх хүсэлтийг Шатахууны үнийн зөвлөлд тавьж улмаар өнгөрсөн оны арваннэгдүгээр сард, шатахууны үнийг чөлөөлөх шийдвэр гаргасан. Энэ талаар Уул уурхай, хүнд үйлдвэрийн дэд сайд О.Батнайрамдал мэдээлэл өгөхдөө АИ92 шатахууны дээр импортлогчдын алдагдлын хэмжээ 350-400 төгрөг. Тэгэхээр өнөөдөр 2050 төгрөгөөр худалдаалагдаж байгаа шатахууны үнэ 2400 орчим төгрөгөөр борлуулагдахаар байгаа юм. Гэхдээ энэ үнийг аажмаар нэмнэ. Өөрөөр хэлбэл, үнэ нэмэгдэх хугацааг зургаан сарын дунджаар тооцоолно. Ингэснээр зах зээлийн журмаараа зохицуулагдаж, дэлхийн зах зээлд газрын тосны үнэ өсөх үед өсч, буурах үед буурах боломжтой болно гэх тайлбарыг хэлж байв. Харамсалтай нь энэ мэдээллээс хойш бензины үнэ олон удаа нэмэгдэж шатахууны үнээс шалтгаалсан бараа бүтээгдэхүүний үнийн өсөлт иргэдийн амьдралд шууд байдлаар нөлөөлөхөд хүрээд байна.