Д.Ганбат: ЖАН-гийнхан сандарч тэвдсэндээ намайг хууль бусаар солих гэлээ, хүлээн зөвшөөрөхгүй

Хуульд өөрчлөлт оруулсны дагуу УИХ дахь АН-ын бүлэг өнөөдөр /2022.08.23/  хуралдаж Д.Ганбатыг УИХ дахь АН-ын бүлгийн даргын албан тушаалаас нь огцруулж, түүний оронд бүлгийн даргаар УИХ-ын гишүүн О.Цогтгэрэлийг сонгожээ.  эгвэл энэхүү хурлын шийдвэрийг УИХ-ын гишүүн Д.Ганбат хууль бус хэмээн үзэж, УИХ-ын дарга Г.Занданшатарт албан бичиг хүргүүлсэн. 

Энэ талаар УИХ-ын гишүүн Д.Ганбатаас тодрууллаа.

Тэрбээр  "Хууль бус зүйл болоод байна. Монгол Улсын нутаг дэвсгэрт хүн бүр хуулиа дээдэлж ажиллах ёстой.  Хуулийн хэд хэдэн заалтыг зөрчсөн. Нэг хүнд зориулж хууль хүртэл баталлаа. Үндсэн хуулийн цэц дээр процесс нь явагдаж байгаа. АН-ын бүлгийн даргыг МАН-ын бүлгийн даргатай адилхан АН-ын удирдлага нь санал болгох ёстой. Улмаар бүх гишүүдийн оролцоотойгоор олонхын саналаар шийдвэрлэнэ. Нөгөөтэйгүүр аль нэг намын асуудалд нөгөө намынхан хутгалдан оролцох ёсгүй. Албан тушаал наймаалцаж, урьдчилж ингэж болохгүй. Цаана нь янз бүрийн гэмт хэргийн бүлэглэл бий гэж хардаж байна. Их хэмжээний мөнгө эргэлдүүлдэг хүмүүс сандарч байх шиг байна" гэлээ.