УИХ-ын Төрийн байгуулалтын байнгын хорооны хуралдаанаар Монгол Улсын Их Хурлын чуулганы хуралдааны дэгийн тухай хуульд нэмэлт оруулах тухай хууль, энэ хуулийг дагаж мөрдөх Монгол Улсын Үндсэн хуульд нэмэлт, өөрчлөлт оруулах журмын тухай хуульд нэмэлт оруулах тухай хуулийн төслийг хэлэлцээд 83.3 хувиар дэмжлээ.
Уг хуулийн төслийг хэлэлцэх үеэр УИХ-ын гишүүн С.Одонтуяа шүүмжлэлтэй байр сууринаас хандав.
Тэрбээр "Энэ хуулийн төсөлд миний нэрийг битгий оруулаарай гэж хэлээд би гарын үсэг зураагүй. Үндсэн хуулийн цэц гэдэг байгууллагад чинь одоо хэн ч итгэхээ больчихлоо. Хараат ажилладаггүй, зөвхөн улстөрчдийн захиалгаар ажилладаг байгууллага боллоо. Энэ байгууллагад өөрсдөө захиалга өгч шийдвэр гаргуулчихаад одоо "Цэцийн шийдвэрийг хэлэлцэх боломжгүй" гээд сууж байгаа нь зарчмын хувьд буруу. Өнгөрсөн хугацааны өнгөрсөн хугацаанд Монголын улс төр, сонгуулийг самарсан. ҮХЦ 1996 оны давхар дээлтэй холбоотой заалтыг үгүйсгэчихсэн мөртлөө одоо хүртэл цуцлаагүй. Гэтэл дахиад Цэц өнөөдөр давхар дээлний асуудалд хоёр шийдвэр гаргачихлаа. Энэ хоёроо эцэслэн нэг болгох шаардлагатай.
Цэцийг дураар нь байлгахгүйн тулд 2015 онд ҮХЦ нь ҮХНӨ-ийг хянан хэлэлцэх эрхгүй гээд хоёр магадлалыг цагаан дээр хараар бичээд гаргачихсан атлаа дахиад сая хүчингүй болгочихлоо. Цэцийхэн гэж яасан дураараа хүмүүс вэ.Би энэ Цэцийн гишүүдэд итгэхгүй. Маргааш магадгүй 76 гишүүнийг гишүүн биш гээд оруулаад ирэхгүй үгүйсгэхгүй. 2012 онд ҮХЦ сонгуулийн холимог хуультай байж болно гэж хэдэн зуун хууль батлуулчихаад 2016 онд болохгүй гээд гаргачихсан.
ҮХЦ-ийн хуульд өөрчлөлт оруулахгүйгээр ҮХНӨ-т оруулах боломжгүй. ҮХЦ-ийн будилаантай гишүүдийг ажлаас нь хал" гэлээ.
Сэтгэгдэл (0)
Сэтгэгдэл бичигдээгүй байна