Б.Жавхлан: НӨАТ-ын сугалааг есдүгээр сараас буцаан сэргээнэ

НӨАТ-ын сугалааг дахин явуулах эсэх талаар Сангийн сайд Б.Жавхлангаас тодрууллаа. 

Тэрбээр " НӨАТ-ын сугалаа явуулах процессийг шинэчлэх шаардлага гарсан тул сугалаа явуулахыг түр зогсоосон. Өмнө нь бүх хэвлэгдсэн НӨАТ-ын баримтуудыг мөн бүртгүүлээгүй баримтыг ч сугалаанд ордог байсан. Азтан тодрохгүй байх асуудлууд гардаг журмаар явж ирсэн.

Шинэчлэлээр зөвхөн бүртгүүлсэн баримтыг сугалаанд оруулдаг болгоно. Мөн бүсчлэх, ил тод болгохоор ажиллаж байна. Иргэн тухайн сардаа НӨАТ-ын 100 баримт бүртгүүлсэн бол бүгд сугалаанд орсон гэдгийг утсан дээрээ харна. Хожих магадлал болон гарч буй тооны мэдээллийг сугалааны үеэр шууд авдаг болно. Иргэн бүр өөрөө сугалаанд оролцогч болох дэвшилтэт, шударга, олон нийт хүлээн зөвшөөрөх хэлбэрээр явуулахаар судалгаа болон бэлтгэлээ хангаж байна. Ирэх есдүгээр сараас НӨАТ-ын сугалааг сэргээхээр төлөвлөж байна. 

Дөрөвдүгээр сард НӨАТ-ын сугалааг зогсоосноор баримтаа уншуулах тоо 50 хувиар буурсан. Үүнээс үзэхэд сугалаа НӨАТ-ын орлогод том хөшүүрэг болдог байсан нь харагдаж байгаа юм. Цаашид олон нийт хүлээн зөвшөөрөхүйц, ил тод явуулна" гэв.