ЦХХХ-ны сайд Н.Учрал Засгийн газрын хуралдаанаас гарсан шийдвэрийг танилцууллаа.
Тэрбээр "Засгийн газрын хуралдаанаар Шинэ сэргэлтийн бодлогод тусгагдсан төрийн бүтээмжийн сэргэлтийг эрчимжүүлэх чиглэлээр Төрийн хэмнэлтийн тухай хуулийн хэрэгжилт болон Цахим Монгол үндэстэн хөтөлбөрийн мөн хэрэгжилтийн талаар мэдээлэл сонсч тодорхой үүрэг чиглэлийг өглөө.
Төрийн хэмнэлтийн хуулийг хэрэгжүүлэхэд мэдээлэл технологийн салбарын хөгжлийн хурдыг ашиглах цаашлаад авлигын индексийг бууруулахад манай яам голлож үүрэг гүйцэтгэнэ. Нийтийн мэдээллийн тухай хуульд зарим мэдээллийг нээлттэй болгох талаар хуульчилсан. Энэ хуулийг хэрэгжүүлэхэд төрийн зарим байгууллагын мэдээллийг авах шаардлагатай. Ашиг малтмалын лиценз олголтыг хүртэл нээлттэй болгосон. Мөн Хувь хүний мэдээлэл хамгаалах хуулиар өнгөрсөн хугацаанд 3.6 сая мэдэгдэл иргэдэд илгээгдсэн. Энэ нь төр тухайн иргэний мэдээллийг ямар зорилгоор ашигласан бэ гэдэг нь мэдэгдэх хуудсаар очсон гэсэн үг. Мөн нийслэлийн түгжрэл, төрийн албаны хүнд сурталтай холбоотойгоор тоон гарын үсгийг хэрэглээнд нэвтрүүлэх шаардлагатай байна. Одоогоор 266 мянган тоон гарын үсэг тараагдсан нь хангалттай бус, улам эрчимжүүлэх чиглэлийг өглөө. Мөн одоогоор таван алслагдсан сум, таван боомтын шилэн кабель тавигдах ажил хийгдэж байна.
Тоон гарын үсгийг банк, санхүүгийн салбарт ч ашиглах боломжтой. Ингэснээр авлигын индексийг бүх түвшинд бууруулах боломж бүрдэнэ.
2022 оны есдүгээр сарын 5-6-нд манай яам НҮБ, Засгийн газар, Цахим хөгжил, харилцаа холбооны яам хамтран олон улсын хурал зохион байгуулна.
Энэ үеэр НҮБ манай улсыг цахим шилжилтийн үлгэр загвар орон гэдгийг албан ёсоор зарлана гэсэн сайн мэдээтэй байна" гэлээ.
Сэтгэгдэл (0)
Сэтгэгдэл бичигдээгүй байна