Засгийн газрын ээлжит хуралдаанаар хэлэлцсэн асуудлыг талаар ЗГХЭГ-ын дарга Д.Амарбаясгалан мэдээлэл хийлээ.
Тэрбээр “Өнөөдрийн хуралдаанаар Монгол Улсын Засгийн газрын зорилт болгосон төрийн бүтээмжийг нэмэгдүүлэх тал дээр онцгой анхаарч ярилцлаа. Төр, иргэн хоорондын харилцааг ойртуулах, төр гаргасан бодлого шийдвэрээ хэрэгжүүлдэг байх зэрэг дээр онцгой анхаарч ажиллах талаар дэлгэрэнгүй ярилцлаа.
2022 оны дөрөвдүгээр сарын 29-нд батлагдсан Төрийн хэмнэлтийн тухай хуулийн хэрэгжилттэй мөн танилцсан. Энэ хууль хэрэгжиж эхэлснээр 2022 оны төсвийн жилд 5.8 орчим тэрбум төгрөгийн хэмнэлт хийх боломжтой гэдэг тооцоо гарсан. Нийтдээ 159 дэд, тэргүүн, орлогч дарга болон зөвлөхүүд чөлөөлсөн. Үүний үр дүнд 1.4 тэрбум төгрөгийн төсвийн хэмнэлт энэ жилдээ гарахаар тооцоолсон. Сайдаас доош албан тушаалтны автомашины хэрэглээг хязгаарлах ажлын хүрээнд төсвийн ерөнхийлөн захирагч нарын эзэмшилд байсан 587 автомашиныг унахгүй битүүмжилж, Засгийн газрын авто баазад хүлээлгэн өгсөн байна. Үүний дүнд төсвийн 268.4 сая төгрөгийг хэмнэсэн байна" гэлээ.
Түүнчлэн Засгийн газрын зүгээс иргэнтэй илүү ойр байх бодлогыг хэрэгжүүлэхээ илэрхийллээ. Энэ хүрээнд ойрын хоёр сарын дотор Ерөнхий сайд, Засгийн газар улс орныхоо өнцөг булан бүрд ажиллаж, амьдарч байгаа иргэдийнхээ санал бодлыг шууд хүлээн авч, улмаар шийдвэрлэх үүрэг чиглэлийг шат шатны албан тушаалтанд өгдөг болохын төлөө бид үйл ажиллагаагаа зориулна гэдгийг тодотголоо.
Монголын төр олон нийтийн шүүмжлэлийг соргогоор хүлээн авч засч залруулахад үйл ажиллагаагаа чиглүүлэх аж.
Сэтгэгдэл (0)
Сэтгэгдэл бичигдээгүй байна