“ТРИО” кино Таллины чонын төлөө өрсөлдөх эрхээ авлаа

Дэлхийд чансаагаараа А зэрэглэлийн топ 15 кино наадамд зүй ёсоор багтдаг "Таллины хар шөнө 26" Эстоны алдартай кино наадамд найруулагч Д.Баттөмөрийн "Трио" кино "сонгогдон, хамгийн нэр хүндтэй хэдий ч хүнд төрөл болох CRITICS' PICKS талбарт дэлхийн томчуудтай Таллины чонын төлөө өрсөлдөхөөр болжээ. 

Ингэснээр “ТРИО” кино Варшав, Тайланд, Палм Спрингс даун синдром наадам гээд 4 дэх наадамдаа уригдаж байна. 

Мөн ирэх есдүгээр сард болох Зүүн Өмнөд Азийн бүс нутагт нэр хүнд бүхий “Тайландын олон улсын кино наадам”-д (International Thai Film Festival) Трио” кино шилдэг 30 киноны тоонд орж, тус наадмын шагналт байранд өрсөлдөхөөр болсон. 

“Трио” кино нь “Хэнийг ч ардаа бүү үлдээ” гэсэн утга санааг агуулж, дауны хам шинжтэй хүмүүсийн эрхийг хамгаалах, эрх тэгш хүртээмжтэй нийгмийг цогцлоохыг уриалсан уран бүтээл бөгөөд Монголын дауны холбооны тэргүүн В.Ганзоригийн дэмжлэгтэйгээр Польш, АНУ болон бусад улсын кино наадамд мөн амжилттай оролцож байгаа юм.