Хуурамч диплом ашиглаж Засаг дарга болсон А.Нурбекийг ажлаас нь чөлөөлөх үү

 Баян-Өлгий аймгийн Дэлүүн сумын Засаг дарга А.Нурбекийг хуурамч дипломтой болохыг нь Баян-Өлгий аймаг дахь сум дундын Эрүүгийн хэргийн анхан шатны шүүхээс 2022 оны тавдугаар сарын 10-ны өдөр шийтгэх тогтоол үйлдэж, А.Нурбекийг Эрүүгийн хуулийн тусгай ангийн 23.2 дугаар зүйлийн 1 дэх хэсэгт заасан "Хуурамч диплом болохыг мэдсээр байж ашиглах" гэмт хэрэг үйлдсэн гэм буруутайд тооцож шийдвэрлэсэн байдаг.

Тэгвэл Засаг дарга А.Нурбек анхан шатны шүүхийн дээрх шийдвэрийг хүлээн зөвшөөрөхгүй хэмээн үзэж,   Давж заалдах шатны шүүхэд хандсан байдаг. Тус  шүүх хурал өнөөдөр  /2022.09.06 / болж, анхан шатны шүүхийн шийдвэрийг хэвээр үлдээн шийдвэрлэжээ. 

Өөрөөр хэлбэл,  Баян-Өлгий аймгийн Дэлүүн сумын Засаг дарга А.Нурбек нь 1998 онд Бүгд Найрамдах Казахстан Улсын Сейфуллины нэрэмжит Ахмола Хөдөө аж ахуйн дээд сургуулийг Зоо-инженер мэргэжлээр төгсөөгүй атлаа уг сургуулийн 0029942 дугаартай "Зоо-инженер" мэргэжлээр төгссөн гэх дээд боловсролын дипломыг хуурамч болохыг мэдсээр байж, 2020 оны арваннэгдүгээр сарын 09-нд Баян-Өлгий аймгийн Дэлүүн сумын Засаг даргын албан тушаалд томилогдохдоо сумын Засаг даргад тавигдах "дээд боловсролтой" гэх шаардлагад нийцүүлэхийн тулд хуурамч бакалаврын дипломыг ашигласан нь хэрэгт авагдсан нотлох баримтуудаар тогтоогдсон байдаг. Анхан шатны шүүхээс түүнд ялын хамгийн бага хэмжээ буюу 800 мянган төгрөгөөр торгож, улсад 25 сая төгрөгийн цалингаа буцаан төлөх шийдвэр гаргасныг өнөөдөр Давж заалдах шатны шүүх хэвээр үлдээлээ.  

Ерөнхий сайд Л.Оюун-Эрдэнэ "Авлига, албан тушаал болон аливаа хэргээр шүүхээс ял, шийтгэл авсан хүнийг төрд дахин ажиллуулахгүй" гэдгээ хэдийнээ мэдэгдсэн билээ. 

Тиймээс хуурамч диплом ашиглаж Засаг дарга болсон А.Нурбект хариуцлага тооцох асуудал  Баян-Өлгий аймгийн Засаг дарга Д.Бауыржанд үлдээд байна.