Монголын анхны I зэрэглэлийн, уулзваргүй төмөр замын нээлтийн ёслол өнөөдөр /2022.09.09/ боллоо.
Тус төмөр зам ашиглалтад орсноор жилд 30-50 сая тн ачаа тээвэрлэх боломж бүрдэж байна. Энэхүү төмөр замын гол замын урт нь 233.6 км бөгөөд 2 өртөө, 6 зөрлөг, 16 гүүрийн байгууламжтай.
Монгол Улсын Засгийн газар 2018 оны наймдугаар сарын 08-ны өдөр “Тавантолгой-Гашуунсухайт чиглэлийн төмөр замын төслийг эрчимжүүлэх тухай” 242 дугаар тогтоол гарган, төслийг хэрэгжүүлэгч “Тавантолгой төмөр зам” ХХК-ийг байгуулсан. Тогтоолын дагуу үндэсний аж ахуйн нэгжүүд дөрвөн жилийн дотор Тавантолгой-Гашуунсухайт чиглэлийн төмөр замыг барьж ийнхүү ашиглалтад орууллаа.
Ингэснээр Монгол Улс, БНХАУ-ын хооронд 60 гаруй жилийн дараа Гашуунсухайт-Ганцмод боомтыг холбосон төмөр замын хоёр дахь гарц бий болж буй.
Тэгвэл энэхүү төслийг эхлүүлсэн Ерөнхийлөгч асан Х.Баттулга Тавантолгой-Гашуунсухайт чиглэлийн төмөр замын нээлтэд оролцоогүй нь өнөөдөр олон нийтийн анхаарал татаж байна. Түүний хувьд "Намайг урина гэсэн, би очмоор байна" гэдгээ өнгөрөгч тавдугаар сард телевизийн ярилцлагад орох үеэрээ тодотгон хэлж байв. Тухайн үед сэтгүүлч Тавантолгой-Гашуунсухайт чиглэлийн төмөр замын нээлт удахгүй болно. Та оролцох уу, таныг урихгүй бол яах уу хэмээн асуухад нь тэрбээр "Намайг урина гэсэн, би очмоор байна. Ерөнхийлөгч У.Хүрэлсүх сая зургаан Ерөнхийлөгч нартай уулзсан уулзалтын үеэр нээлтэд таныг урина шүү гэж хэлсэн. Би баярлаад уухайн тас очно" гэж хэлж байсан юм.
Гэвч Ерөнхийлөгч асан Х.Баттулгад тус нээлтийн урилга очоогүй бололтой.
Сэтгэгдэл (0)
Сэтгэгдэл бичигдээгүй байна