Н.Учрал: Төр иргэнээ таниад иргэний үнэмлэхийг нь өгч байхад дахиад нотариатаар гэрчлүүлдэг байж болохгүй

Иргэний үнэмлэх, жолооны үнэмлэх, гэрлэлтийн гэрчилгээ гэх мэт 74 бичиг баримтыг нотариатаар гэрчлүүлэх шаардлагагүй болсон. Энэ талаар Цахим хөгжил, харилцаа холбооны сайд Н.Учрал хэлэхдээ тэрбээр "Өнөөдрөөс эхлэн И-монголиа системээр үзүүлж байгаа 74 тооны лавлагаа, тодорхойлолтыг нотариатаар гэрчлүүлэх шаардлагагүй боллоо. Үүнд талуудтайгаа нэгдсэн ойлголтод хүрсэн. Иргэдээс ямар ч тохиолдолд иргэний үнэмлэх, жолооны үнэмлэх, төрсний гэрчилгээ, нас барсны, оршин суугаа газрын хаягийн бүртгэлийн, нийгмийн даатгалын шимтгэл төлөлт зэрэг 74 тооны лавлагаа, тодорхойлолтыг төрийн байгууллага, албан тушаалтан нотариатаар гэрчлүүлэхийг шаардахгүй.Өөрөөр хэлбэл эдгээр бичиг баримтыг нотариат өөрөө гэрчлэх боломжгүй болсон гэсэн үг. 

Төр иргэнээ таньж иргэний үнэмлэх, жолооны үнэмлэхийг нь өгчихөөд дахиад нотариат батлуул гэж шаарддаг байж болохгүй. Төрийн цахим систем нь хүнд суртлын түгжрэлийг арилгахад л оршино. Хууль батлуулах явцад оролцож байсны хувьд одоо хуулийн хэрэгжилт нь хаана гацаад байна вэ гэдгийг нь засахад анхаарч ажиллаж байна.

  Хэрэв иргэнээс шаардвал 11-11 төвд хандах боломжтой. Мөн энэ оны арванхоёрдугаар сарын 1-ний дотор нотариатаар хийсэн гэрээнүүдийг И-монголиа системд байршуулна. Мөн гадаадад ажиллаж, амьдарч байгаа иргэддээ зориулж тоон гарын үсгийг нотариатын үйл ажиллагаанд нэвтрүүлнэ.  Ингэснээр цахимаар нотариатын үйлчилгээг авах боломж бүрдэнэ. 

Цаашид мөн банк санхүүгийн салбарын тодорхой мэдээллийг цахим болгоно" гэлээ.