МАН-ын бүлэг Их тэнгэрт хуралдаж байна

Ирэх оны төсвийг арваннэгдүгээр сарын 15-ны дотор батлах хуулийн заалттай тул  УИХ дахь МАН-ын бүлэг нэлээд ач холбогдол өгч ажиллаж байна. Өчигдөр ирэх оны төсвийн төслийн талаар Засгийн газрын хуралдаанаар хэлэлцсэн бол өнөөдөр  МАН-ын бүлэг Их тэнгэрт төсвийн бодлогоо ярьж байна. Бүлгийн гишүүдийн тал хувь нь хуралдаа оролцож байгаа аж. 

2023 оны төсөв бол эдийн засгийг тэлэх, төр хувийн хэвшлийн түншлэлийг бэхжүүлэх хөгжлийн төсөв болно гэдгийг Сангийн яамнаас тодотгосон. 

Мөн олон улсын байгууллагуудаас халамжын бодлогуудыг танаж, зорилтот бүлэг рүү чиглүүлэх зөвлөгөөг өгсөн билээ. 

 Ирэх оноос хөгжлийн төслүүдийг эхлүүлж, хүртээмжтэй өсөлтийг хангах, экспортыг нэмэгдүүлэх, хөрөнгө оруулалтыг дэмжих замаар эдийн засгаа сэргээх шинэчлэлийг үе шаттай хийх юм. 

Цар тахлын хариу үйлдэл, иргэдийн орлого, ажлын байрны асуудал ч эдийн засгийн сэргэлтгүйгээр бүрэн шийдэгдэх боломжгүй юм. Уул уурхайгаас гадна боловсруулах аж үйлдвэр, хүнс, хөдөө аж ахуй, эрчим хүч,  аялал жуучлал ба жижиг, дунд үйлдвэрлэл, тээвэр логистик, бүтээлч үйлдвэрлэл, цахим салбар зэрэг эдийн засгийн тэргүүлэх чиглэлийн хөгжлийг цогцоор дэмжихэд ирэх жилийн улсын төсөв зориулагджээ.