2020 оны УИХ-ын сонгуулиас хойш учраа олж чадахаа байсан АН-ынхан өчигдөр /2022.09.28/ дахин их эвлэрлийн уулзалтаа хийлээ.
Энэ удаагийн эвлэрлийн уулзалтад АН-ын лидерүүд өргөн бүрэлдэхүүнээрээ оролцсон бөгөөд уулзалт Шангрила-гийн "Brusells" ресторанд буюу уушийн газар болсон гэдгээрээ онцлог байв.
Уулзалтад С.Эрдэнэ, Х.Баттулга нар оролцоогүй ч өөрсдийн төлөөллийн хүмүүсээ ирүүлжээ. С.Эрдэнийн хувьд Азийн улс төрийн намуудын олон улсын хуралд оролцож яваа. Уг уулзалтад АН-ын лидерүүдээс Ц.Элбэгдорж, С.Баярцогт, Э.Бат-Үүл, Баабар, Да.Ганболд, Фортуна Н.Батбаяр, Х.Тэмүүжин, З.Нарантуяа нараас гадна УИХ-ын гишүүдээс Д.Ганбат, С.Одонтуяа, Д.Бат-Эрдэнэ, Б.Пүрэвдорж нар хүрэлцэн иржээ.
Харин Х.Баттулгын талаас Ө.Шижир, И.Мөнхжаргал, Ш.Түвдэндорж нар, С.Эрдэнийн талаас Ц.Оюундарь, Ч.Өнөрбаяр, Ч.Отгочулуу, М.Тулгат, О.Баасанхүү нар оролцжээ. Түүнчлэн ТЕГ-ын дарга асан Б.Хурц хүртэл АН-ын хуваагдалд санаа зовниж, ирж үзэл санаагаа хэлжээ.
АН-ын хуваагдалд аль нэг талыг бариад явдаггүй Лу.Гантөмөр уулзалтад харагдсангүй.
Уулзалтын талаар Ерөнхийлөгч асан Ц.Элбэгдорж "Их хотын дундах буйдхан, хөл хөдөлгөөн үл тасрах уушийн газар. Багтахаараа цуглаж, бодсон санаснаа хэлэлцлээ. Бүгд сэтгэл санаа өндөр бас урам зориг нэмлээ. Цөөнгүй хүн санал бодлоо хэллээ. Бие биетэйгээ ярьж суулаа. Хүний гар их хүчтэй юм. Гар гараа барилцах, хоорондоо уулзалдах нь ямар ч хэл ам, атаа хорсол, ан цавыг анагаах чадалтай аж. Монголынхоо төлөө хэн ч бай, хувийн ашиг сонирхлоо хойш тавьж, барьсан чулуугаа газар хаяж, гомдлоо залгиж чадах ёстой. Чадлаа. Уулзлаа. Ярилаа. Асуудлыг гар гартаа авлаа. Бусдын тоглоомд ордог цаг зогслоо. Өөрсдийн асуудлаа өөрсдөө шийдэхээр тохирлоо" гэжээ.
Ц.Элбэгдоржийн хэлсэнчлэн уулзалтын үр дүн удахгүй харагдах биз ээ.
Сэтгэгдэл (0)
Сэтгэгдэл бичигдээгүй байна