Нүүрсний хэрэгтэй холбоотойгоор АТГ, ЦЕГ-ын ажилтнууд өчигдөр шөнө гүйцэтгэх ажиллагаа явуулж найман хүнийг баривчилан Цагдан хорих 461 дүгээр ангид саатуулсан байна.
Тодруулбал, "Эрдэнэс Тавантолгой" ХК-ийн захирал асан Б.Ганхуяг, түүний эхнэр, мөн эгч Б.Нарантуяа "Миний найзууд" цэцэрлэгийн эрхлэгч, "Пеарл преперплиз" ХХК-ны захирал П.Бадамханд, хүргэн "Бест хаус констракшин" ХХК-ны захирал Д.Пүрэвдорж, "Эрдэнэс силвер ресурс" ХХК-ийн захирал асан Т.Мөнхбаяр, "Эрдэнэс Тавантолгой" ХК-ийн албаны дарга С.Энхтөр, "Сагсайс Редер" ХХК-ийн захирал С.Энхтүвшин, "Хишиг арвин индустрал" ХХК-ийн эзэн Б.Хишигдорж, тус компанийн гүйцэтгэх захирал М.Хүрэлбаатар нарыг баривчилсан байна.
Ташрамд: Ерөнхий сайд Л.Оюун-Эрдэнэ өнгөрсөн хавар хэвлэлийнхэнд мэдээлэл хийх үеэрээ Хөгжлийн банкны хэргийн дараагаар нүүрсний асуудлыг хөндөж, улсаа хохироосон хүмүүсийн хэргийг гаргаж тавина гэж байсан. Түүнчлэн төв талбайд өрнөсөн иргэдийн жагсаалыг ЭТТ ХК-ийн удирдлагуудаас зориуд турхирсан гэж Ерөнхий сайд мэдэгдээд байгаа.
Тэгвэл урьдчилсан байдлаар тэдний нэг нь жагсаал зохион байгуулахад гол үүрэн гүйцэтгэсэн нь тогтоогдоод байгаа аж. Тэдний гэр оффист хийсэн нэгжлэгээр онц их хэмжээний мөнгө, бусад хориотой хэрэгсэл илэрсэн байна.
Тодруулбал: "Сагсайс Редер" ХХК-ийн захирал С.Энхтүвшингийн гэрээс Хятадын банкны тэмдэг 100 мянган ам.доллар, 70 сая төгрөг, "Хишиг арвин индустрал" ХХК-ийн эзэн Б.Хишигдоржийн гэрээс 300 сая төгрөг, "Эрдэнэс Тавантолгой" ХК-ийн захирал асан Б.Ганхуягийн гэрээс тусгай төхөөрөмж илрүүлэгч гарч ирсэн байна.
Сэтгэгдэл (0)
Сэтгэгдэл бичигдээгүй байна