''Зээлийн барьцаанд байсан мал үхсэн учраас малчдын зээлийг эрсдэлийн даатгалаас төлөх ёстой''

"Малчдын зээлийг тэглэх тухай" асуудлаар /ММНХ/-ноос өнөөдөр мэдээлэл хийлээ.  Тус холбооны тэргүүн Э.Пүрэвсүрэн "Малчид дунджаар 5-30 сая хүртэлх төгрөгийн зээл авдаг юм байна. Одоо яг эрсэдсэн үед нь ирчхээд байна. Банкны барьцаалсан мал үхчихсэн. Банкны барьцаанд өгсөн хөрөнгө маань үхээд зээлээ төлөх боломжгүй болсон учраас зээлийн эрсдэлийн даатгалаараа төлүүлье гэсэн ажлыг хийгээд явж байна. 

Манай холбооноос санаачилсан энэ ажлыг малчид дэмжээд банкандаа барьцаалсан мал үхсэн учир эрсдэлийн даатгалаараа төлөөд өгөөч ээ гэсэн өргөдлийг бичиж өгөх хэрэгтэй. Малчид зээлийн эрсдэлийн даатгал, индексжүүлсэн даатгал гэсэн хоёр даатгалд даатгуулдаг. Эдгээр нь цаашаа давхар Үндэсний давхар даатгалд даатгуулдаг юм байна. Тэр даатгал нь цаашлаад олон улсын СКОР даатгалын компанитай хамтарч ажилладаг юм байна. 

Иргэний тухай хуулийн 222.2-т заасны дагуу үүргээ биелүүлж чадахгүй буюу байгалийн гамшгийн эрсдэл үүссэн учраас дэлхийн топ СКОР даатгалаас гаргуулах боломж гарч ирж байна гэж харж байгаа юм. 

Иймд зээлтэй малчин байвал эрсдэлийн даатгалаараа төлүүлэх боломж гарч байна. Энэ нь татвар төлөгчдийн мөнгө, төр засаг, арилжааны банкнаас ч биш зөвхөн эрсдэлийн даатгалаараа төлүүлэх боломж юм" гэв.