Улс төрд шинэ манлайлагч, шинэ дүр төрх тодруулах “Кандитат” реалити нэвтрүүлэгт салбар бүрийг төлөөлөх 100 оролцож, эхний шатад 49 нь хасагдлаа

Монгол тв-ийн шинэ бүтээл болох “Кандидат” улс төрийн реалити нэвтрүүлэг өчигдөр буюу 4-р сарын 29-нд эхний дугаараа үзэгчдэд толилууллаа.

Улс төрд шинэ манлайлагч, шинэ дүр төрх, шинэ төлөөллийг тодруулах зорилготой Кандидат реалити нэвтрүүлэгт Монгол улсын өнцөг булан бүрээс ирсэн 1000 гаруй хүсэлтээс сонгон шалгаруулж, салбар бүрийг төлөөлөх 100 шилдэг залууг нэвтрүүлэгт оролцуулжээ. Тэд өөрсдийн эрдэм мэдлэг, ур чадвар, туршлагаа сорьж өрсөлдөх бөгөөд шагналын сан 500 сая төгрөг байна.

Кандидат улс төрийн реалити нэвтрүүлэгт гадаад улсад дээд мэргэжил эзэмшсэн Нисэхийн инженер, судлаач, гарааны бизнес эрхлэгч, сумын багш, аймгийн төлөөлөл, тусгай хэрэгцээт иргэдийн эрх ашиг, бүтээмжийн төлөө ажиллаж буй төлөөлөл зэрэг нийгмийн бүх үе шатыг төлөөлөхүйц залуус оролцсныг тэдний танилцуулгаас харж болохоор байна.

Эхний дугаарын сорилт нь асуулт, хариулт. Ингэхдээ өөр өөр сэдвийн тодорхой тооны асуултуудад 100 оролцогч 15 секундын хугацаанд асуултаа уншиж, 15 секундын хугацаанд хариуллаа. Мөн тусгай хэрэгцээт оролцогчдод зориулан брайл үсэгтэй цаасан тест олгожээ. Улс төр, нүүдэлчдийн соёл, дэлхий дахин, танин мэдэхүй зэрэг авхаалж самбаа, мэдлэг шаардсан нийт 100 асуултад 100 оролцогч хариуллаа. Харин энэхүү сорилоос зөвхөн шилдэг 51 оролцогч дараагийн шатад шалгарлаа. 

Парламент бол иргэдийн төлөөлөл. Тэнд нийгмийн давхарга, хүн нэг бүрийг төлөөлөхүйц мэдлэгтэй, мэдрэмжтэй улс төрч байх шаардлагатай гэж иргэдээс авсан судалгааны дүнд дурдагджээ. Гэвч энэхүү хэрэгжилт хангагдахгүй, иргэд төрд итгэх итгэлгүй болсоор тэр хэрээр жил ирэх тусам сонгуульд оролцох залуусын идэвх буурсаар байгааг судалгааны тоо баримтууд илтгэж байна. Нөгөөтэйгүүр улс төр гэх ойлголт иргэдээс хэт хол түвшинд очсон нь ч цөөнгүй судалгаагаар нотлогдож байна. Тиймээс олон нийт дундаас өөрсдийн төлөөлж чадах хүнийг нэвтрүүлгээрээ дамжуулан олохоор Монгол ТВ-ийн хамт олон хэвлэл мэдээллийн хэрэгслийн үүргээ биелүүлж ийнхүү хүчтэй шуурга руу эрсдэл дагуулан орж, эхний дугаараа үзэгчдэд хүргэлээ. Харин дараагийн дугаарт эдгээрт залуус баг болж хуваагдан, сонирхолтой бөгөөд ширүүн өрсөлдөөнийг үзүүлэхэд бэлэн болжээ.

Кандидат улс төрийн реалити нэвтрүүлэг долоо хоног бүрийн Мягмар, Ням гарагт 21:00 цагаас үзэгчдэд хүрнэ.
Эхний дугаар фэйсбүүкээр үзэгчдэд шууд хүрсэн бөгөөд та дараах холбоосоор орж үзэх боломжтой:
Facebook холбоос - https://www.facebook.com/mongoltv/videos/2139607779721025
Youtube холбоос - https://www.youtube.com/watch?v=84k6L1VzE6c