АВСТРАЛИАС ӨМНӨД СОЛОНГОСТ НИЙЛҮҮЛДЭГ ҮХРИЙН МАХНЫ ХЭМЖЭЭ ГУРАВ ДАХИН ӨСЧЭЭ

Австрали нь Өмнөд Солонгосын зах зээлд нийлүүлдэг үхрийн махны хэмжээгээ 30 жилийн дотор гурав дахин өсгөсөн тухай “Yonhap News” мэдээлж байна. Австраличууд анх 1978 онд Өмнөд Солонгосын зах зээлд үхрийн мах нийлүүлж эхлэн ч удалгүй хориг тавигдсан тул зогсоосон байна. Ингээ 1988 оны Сөүлийн Олимпын тоглолтын дараагаар Өмнөд Солонгосын зах зээлд үхрийн мах дахин нийлүүлж эхэлжээ. Түүнээс хойш Өмнөд Солонгост нийлүүлдэг Австралийн үхрийн махны хэмжээ жилээс жилд өссөөр ирсэн байна.Тухайлбал, 2012 онд 125 мянган тонныг нийлүүлж байсан бол 2016 онд 179 мянган тонн болсон. Гэхдээ 2017 онд 148 мянган тонн болж нэлээд буурсан ч 2018 онд дахин өсч 170 мянган тонн болсон. Энэ оны эхний таван сарын байдлаар Өмнөд Солонгост 66 мянган тонн үхрийн мах нийлүүлээд байгаа аж. 1990 он Өмнөд Солонгос дахь үхрийн махны хэрэглээ 4,2 кг байсан бол 2018 онд 12,6 кг болж нэмэгджээ.