2014 оны зун Малайзын зорчигч тээврийн "Боинг" онгоцыг Украины Донбасс мужийн дээр пуужингаар харван сөнөөсөн хэргийн буруутан дөрвөн хүнд эрүүгийн хэрэг тулгахаар болсноо Хамтарсан мөрдөн байцаалтын бүлэг (JIT) мэдээлэв. Нидерландад болсон хэвлэлийн бага хурлын үеэр "JIT"-ийн төлөөлөгчид нь тус хэргийн гол буруутан гэж үзэж байгаа дөрвөн хүний нэрийг дурдсан байна.
Эдгээр нь ОХУ-ын харьяат Игорь Гиркин, Олег Пулатов, Сергей Дубинский, мөн Украйны харьяат Леонид Харенко нар юм байна. Энэ хүмүүс нь "Боинг"-ийг онож устгасан гээд байгаа зенитийн пуужингийн "БУК" цогцолборын шилжилт хөдөлгөөнтэй холбоотой гэж "JIT" үзэж байгаа. Тэднийг баривчлах олон улсын ордерийг өгнө аж.
Энэхүү мэдэгдэлтэй холбоотойгоор ОХУ-ын Гадаад харилцааны яам мэдэгдэл хийж "Зургаадугаар сарын 19-нд болсон хэвлэлийн бага хурлын үеэр Оросын цэргийн албан хаагчдыг Малайзын "Боинг" МН17 рейсийн сүйрэлд хамаатай гэгдсэн Хамтарсан мөрдөн байцаан бүлгийн мэдэгдэл нь харамслаас өөр ямар ч сэтгэгдэл төрүүлсэнгүй. ОХУ-ын нэр хүндийг олон улсын хамтын нийгэмлэгийн өмнө унагахад чиглэсэн ээлжит удаагийн ямар ч үндэслэлгүй ял зэмлэлийг Оросын талд тулгаж байна" гэжээ.
2018 онд "JIT" Малайзын онгоцыг сөнөөсөн хэрэгт ОХУ буруутай гэж мэдэгдэхэд Малайзын эрх баригчид нь энэ хэрэгт Оросыг буруутгах нь үндэслэлгүй гэж мэдэгдэж байсан юм.
Сэтгэгдэл (0)
Сэтгэгдэл бичигдээгүй байна