​ГЕРМАНД ЭРЧҮҮДИЙГ ГЭР БҮЛИЙН ХҮЧИРХИЙЛЛЭЭС ХАМГААЛАХ ХӨТӨЛБӨР ХЭРЭГЖҮҮЛНЭ

Германы Бавари ба Хойд Рейн - Вестфал мужуудын эрх баригчид эрэгтэйчүүдийг гэр бүлийн хүчирхийллээс хамгаалах хөтөлбөр хэрэгжүүлэхээр болсноо зарлалаа гэж "Deutsche Welle" мэдээлэв.

Бавари мужийн Гэр бүл ба нийгмийн асуудал хариуцсан сайд Керстин Шрайер, Вестфаль мужид мөн адил алба хашдаг Ина Шаррренбах нар нь "Гэр бүлд эрэгтэйчүүд ч хүчирхийлэлд өртөж байгаа бөгөөд өнөөдрийг хүртэл тэдэнд зориулсан дэмжлэг, тусламж үзүүлэхгүй явсаар ирсэн" гэсэн байна.

Тэдний санаачилсан шинэ хөтөлбөр нь хэд хэдэн үе шаттай хэрэгжих аж. Үүнд: эхлээд шуурхай тусламжийн утас ба онлайн зөвлөгөө ажиллаж эхэлнэ, дараа нь хүчирхийллийн золиос болсон эрчүүдэд зориулсан хоригдох ба зөвлөгөө өгөх байр ажиллаж эхэлнэ.Ингэснээр ХБНГУ даяар үүнтэй адил хөтөлбөр хэрэгжүүлж эхлэн хүчирхийлэлд өртсөн эрэгтэйчүүд өөрийн асуудлын талаар чөлөөтэй ярих боломжтой болно гэж төслийг санаачлагчид үзэж байгаа аж.

Германы цагдаагийн газрын мэдээгээр 2018 онд гэр бүлийн хүчирхийлэлд өртсөн хүмүүсийн 17,9 хувь нь эрэгтэйчүүд байсан. Цагдаа нар нь хамтрагчдынхаа зүгээс гаргасан хүчирхийлэл, амь насанд халдах, эрх чөлөөг нь хязгаарлах, танхайрах зэрэг үйлдэлд хохирсон 23872 тохиолдлыг бүртгэжээ. Гэвч бодит байдал дээр эрэгтэйчүүд ичих эсвэл итгэхгүй байх гэж болгоомжлолын үүднээс ийм хэргийн талаар мэдээлэх нь ховор байдаг тул хохирогчдын тоо хавьгүй олон гэж мэргэжилтнүүд үзжээ.