Туркмен улсад "Ерөнхийлөгч Гурбангулы Бердымухамедов бол цогцлон сүндэрлүүлэх шинэ эриний бүтээгч мөн" гэсэн сэдвээр шинжлэх ухаан практикийн хурал зохион байгуулагдсан тухай "Turkmenportal" мэдээлж байна.
Тус хурлыг Туркмений олон нийтийн байгууллагууд зохион байгуулж, тус улсын олон намуудын төлөөлөл, парламентын гишүүд, овгийн ахлагч нар, яамд ба албадын төлөөлөгчид оролцжээ. Оролцогчид нь "Ерөнхийлөгч Бердымухамедовын нарийн шалгаж, шинжлэх ухааны үндэслэлтэй тооцсон стратегийн жанжин шугам бол Туркмен улсыг тогтвортой урагшилсан хөгжлөөр хангах гол үндэс суурь мөн" гэсэн дүгнэлт хийсэн гэнэ. Цаашлаад, "Гурбангулы Бердымухамедовын төрийн бодлого нь аз жаргал, хүчирхэгжихийн эриний эхлэлийг тавьсан.... үндэстний манлайлагчийн удирдлага дор хүрсэн амжилтыг олон улсын тэргүүлэгч байгууллагууд хүлээн зөвшөөрч, өндрөөр үнэлсэн" гэх мэт мэдэгдэл гаргаад эцэст нь Бердымухамедовыг 62 насны төрсөн өдрөөр нь баяр хүргэн "энэ өдөр бол Туркмен хүн бүрийн амьдралд чухал ач холбогдолтой өдөр" гэжээ.
ЗХУ задран унасны дараагаар Дундад Азийн шинэ тулгар улсуудад автократ дэглэмүүд тогтсон. Тиймээс тэдгээр улсад төрийн тэргүүндээ элдэв цол гуншин өгч, магтах нь ердийн хэрэг. Гэхдээ л тэр дундаас Туркмен дэх нэг хүнийг тахин шүтэх үзэл, энэ улсын Ерөнхийлөгчийн авсан цол гуншин нь хамгийн онцгой гэж болно.
Коммунист угшилтай, угсаа залгамжилсан хоёрхон дарангуйлагч дэглэм дэлхий дээр байдаг гэдэг. Нэг нь, Хойд Солонгос, нөгөөх нь Туркменистан гэж үздэг. Нэг хүнийг тахин шүтэх үзэл гээч ямаршуу хэлбэртэй, яаж илрээд, яаж хэрэгждэгийг өөрийн нүдээр харахыг хүсдэг хүмүүс, улс төр болон урлаг судлаачид энэ хоёр улсаар айлчлахыг ихэд сонирхогдог ажээ.
Сэтгэгдэл (0)
Сэтгэгдэл бичигдээгүй байна