Филиппиний дарангуйлагч агсан Фердинанд Маркосын бэлэвсэн эхнэр Имельда Маркосын 90 насны төрсөн өдрийг тэмдэглэх баярт оролцсон 200 гаруй хүн хордсон тухай "Daily Mail" уламжилсан байна.
Имельда Маркосын төрсөн өдрийг нийслэл Манилагийн нэгэн цэнгэлдэх хүрээлэнд тэмдэглэж, баярт 2500 гаруй хүн оролцсон байна. Баярт оролцсон хүмүүс Имельдаг магтсан үг хэлж, дуу дуулж байсан бол тэдэнд экс тэргүүн хатагтайн нэрээр нэрлэсэн цэвэр ус, хоолыг тараан өгч байжээ. Гэвч удалгүй оролцогсдын дундаас толгой эргэсэн, бөөлжүүлсэн гэсэн шинж тэмдэгтэй хүмүүсийг олноор нь эмнэлгүүдэд хүргэж эхэлсэн байна. Эмнэлгийн төлөөлөгч нь тэдгээр хүмүүсийг хордлого авсан гэсэн.
Имельда Маркосыг талийгч нөхрийнх нь төр барьж байх үеийн авлигын хэргээр 2018 онд шүүж, 200 сая орчим долларыг Швейцарь дахь сангуудаараа дамжуулан хилийн чанад руу гаргасан хэрэгт буруутай гэж үзсэн юм. Гэвч түүнийг давж заалдах шатны шүүх хурал болтол барьцаагаар түр суллаад байгаа. Хэрэв дээд шатны шүүх түүнийг буруутай гэж үзвэл олон арван жил хорих ял авна.
Филиппиний 10 дахь Ерөнхийлөгч Фердинанд Маркос нь 1965-1986 онуудад төр барьсан. Энэ хугацаанд Имельда нь төрийн өндөр тушаалд томилогдон, дипломат ажил хийж байжээ. 1986 онд цэргийнхэн төрийн эргэлт хийж Фердинанд Маркосыг түлхэн унагасны дараагаар Имельда нь нөхрийн хамт хилийн чанад руу зугатсан. Нэлээд хэдэн жилийн дараа Имельда нь нутагтаа эргэн ирээд Ерөнхийлөгчийн сонгуульд хоёр ч удаа оролцож, парламентад хоёр удаа сонгогдсон байдаг.
Сэтгэгдэл (0)
Сэтгэгдэл бичигдээгүй байна