Гибралтарын хоолойд Их Британийн Тэнгисийн цэргийн хүчний онгоцнууд газрын тос тээвэрлэгч Ираны усан онгоцыг баривчилсан байна. Америкийн зүгээс гаргасан хүсэлтийн дагуу Панам улсын далбаатай хөвж байсан "Grace 1" газрын тос тээвэрлэгчийг саатуулсан аж. Тус усан онгоцыг Европын холбооны зүгээс Сири улсын эсрэг авсан эдийн засгийн хориг арга хэмжээг зөрчин тус улс руу газрын тос тээвэрлэж байсан гэж сэжиглэн саатуулсан байна.
Сирийн эсрэг 2011-ээс 2014 онуудад удаа дараалан авсан эдийн засгийн хориг арга хэмжээ нь тус холбооны түүхэнд авч байсан хамгийн хатуу хориг гэж үздэг. Эдгээр шийдвэрийн дагуу Европын холбооны бүх улсыг Сиритэй ямарваа нэг бизнес хийх, түүний дотор газрын тос ба түүний бүтээгдэхүүнтэй холбоотой бизнес явуулахыг эрс хатуу хориглосон. Мөн Сирийн хууль ёсны Засгийн газартай холбоотой бүх л санхүүгийн гүйлгээг хаасан.
Их Британий эрх баригчдын хийсэн үйлдлийн дараагаар Иран нь Британийн Элчин сайдыг дуудан эрс эсэргүүцэл илэрхийлж, тайлбар өгөхийг шаардлаа. Ираны ГХЯ-ны албан ёсны төлөөлөгч нь "Газрын тос тээвэрлэгч усан онгоцыг булаан эзэлсэн Их Британийн зүй бус үйлдэл нь Персийн булан дахь хурцадмал байдлыг даамжрахад хүргэж болзошгүй" гэжээ.
Сэтгэгдэл (0)
Сэтгэгдэл бичигдээгүй байна