Энэтхэгийн Телинган мужид эмч нар нас барсан гэж үзсэн залуу оршуулгын ажиллагааны үеэр амилсан тухай "Hindustan Times" сонин мэдээлж байна.
Гэндэм Киран гэгч залуу зургаадугаар сарын 26-нд өндөр халуурсан шинж тэмдэгтэй эмнэлэгт хүргэгдэхэд эмч нар хурц хэлбэрийн шар гэсэн онош тавьжээ. Хоёр өдрийн дараа залуугийн биеийн байдал эрс муудан комд ороход төрөл төрөгсөд нь хувийн эмнэлэгт хүргэн хиймэл амьсгалын аппаратад залгасан байна. Гэвч долоодугаар сарын 3-нд биеийн байдал огцом муудахад эмч нар үзээд тархи нь үхэжсэн тул амьд гарах боломж байхгүй гэсэн онош тавьжээ.
Үүний дараа Кираны ар гэрийнхэн түүнийг гэр рүүгээ авч явсан байна. Улмаар нас барсан гэж үзээд чандарлахаар бэлдэж байтал залуугийн нүднээс нулимс урсахыг эх нь олж хараад эмч яаралтай дууджээ. Эмч үзлэг хийгээд залуугийн зүрх нь хэвийн цохилж байгааг баталж. Үүний дараа түүнийг эмнэлэгт дахин хүргэсэн бөгөөд Киран нь гурав хоногийн дараа ухаан ороод ярьж эхэлсэн байна. Гурав хоногийн өмнө түүний биеийг сайжирсан гэж үзээд эмнэлгээс гаргажээ.
Сэтгэгдэл (0)
Сэтгэгдэл бичигдээгүй байна