​ЯПОНЫГ ЭНХИЙН ГЭРЭЭ БАЙГУУЛААГҮЙ ЦАГТ АРЛУУДЫН АСУУДЛЫГ ХЭЛЭЛЦЭХГҮЙ ГЭВ

Орос Японы энхийн гэрээ байгуулахтай холбоотой хэлэлцээрийн үеэр Оросын тал нь маргаантай арлуудыг Японы мэдэлд шилжүүлэх талаар ярилцахаас эрс татгалзсан тухай Японы "Kyodo" агентлаг мэдээлж байна.

Оросын тал маргаантай арлуудыг өгөх талаар ярилцахаас татгалзсан шалтгаан нь Япон ба Америк хоорондын цэргийн эвслийн харилцаа гэж "Kyodo" агентлаг мэдээлжээ. Тодруулбал, маргаантай арлуудын хоёрыг нь Японд шилжүүлэн өглөө гэхэд маргааш өдрөөс нь Америкчууд тэнд цэргийн баазаа байрлуулан Оросын Алс дорнодын хязгаарт заналхийлж эхлэхгүй гэсэн баталгаа үгүй. Япон дахь Америкийн цэргийн командлалын зүгээс ийм алхам хийх бодолгүй гэсэн утгатай мэдэгдэл хийж байсан ч Оросын тал түүнд нь итгээгүй нь ойлгомжтой.Түүнчлэн арлуудыг тойрон эдийн засгийн онцгой эрхтэй бүс гэж үүсдэг тул тус бүс нутаг дахь Оросын Тэнгисийн цэргийн хүчний боломж, нөлөө буурна гэж үзэж байгаа бололтой.

Арлуудыг өгөхөөс татгалзахад хүргэж байгаа өөр нэг шалтгаан нь Оросын эрх баригчид иргэдийнхээ дэмжлэгийг алдахаас болгоомжилсон явдал гэж байна. Сар гаруй өмнө маргаантай арлуудыг Японы талд хүлээлгэн өгөх талаар оросуудын дунд санал асуулга явуулахад дийлэнх олонх нь буюу 98 хувь эрс татгалзаж байгаагаа мэдэгдэж байсан билээ.

Ийм оросууд энхийн гэрээ байгуулаагүй цагт арлуудыг өгөх тухай яриаг хийхгүй гэсэн байр сууринд хатуу зогсоожээ. Орос Японы хооронд дэлхийн хоёрдугаар дайны дууссанаас хойш өдий хүртэл энхийн гэрээ байгуулаагүй байгаа юм. Энхий гэрээ байгуулна гэдэг нь япончууд Дэлхийн хоёрдугаар дайны дараа үүссэн бүх л нөхцөл байдал, түүний дотор газар орны талаарх бүх бодит байдлыг хүлээн зөвшөөрч байгаа хэрэг болох юм. Гэтэл тухайн үеийн Зөвлөлт нь маргаантай гэгдэж байгаа арлуудыг дэлхийн хоёрдугаар дайны төгсгөлөөр дайнд амссан хохирлын төлбөр болгон өөрийн мэдэлдээ авсан гэдэг. Тиймээс энхийн гэрээ байгуулбал нэг талаас эдгээр арлуудыг Зөвлөлтийн хууль ёсны залгамжлагч болсон ОХУ-ынх мөн гэдгийг хүлээн зөвшөөрсөн хэрэг болох юм. Эдгээр арлууд нь 1945 он хүртэл Японы мэдлийнх байсан аж.