Украйн Гадаад харилцааны сайд Вадим Пристайко "Эрх чөлөө радио"-д ярилцлага өгөх үеэр салан тусгаарлахыг хичээж байгаа мужуудынхаа асуудлыг шийдэж чадахгүй байвал яваандаа хоёр хэсэг хуваагдсан Кипр аралтай адил байдалд орж магадгүй тухай мэдэгджээ. "Минскийн тохиролцоо"-г хэрэгжүүлэх гэж таван жил чармайсан ч Оросоос болж үр дүнд хүрээгүй тул Өрнөдийн орнууд зөвшөөрвөл өөр тохиролцоонд хүрэх талаар ярих хэрэгтэй гэдгийг сайн онцолжээ. Гэхдээ хэрэв өөр арга зам бас бүтэлгүйтсэн тохиолдолд Киев нь цаашид байдлыг хэрхэх талаар бодож эхлэх цаг болсон. Пристайко энэ талаар "Булаан эзлэгч хэсэг газрыг нь "зулгаалгачихсан" гэдгийг мэдэж байгаа ч улс орон нь ард түмний олонхын сонгосон хөгжлийн тэр чигт хөдөлж, хөгжсөн хэвээр байх "Кипр маягийн хувилбар" байж болох юм" гэжээ.
Украйны Гадаад хэргийн сайдын яриаг Туркийн эрх баригчид яаж хүлээж авах нь ойлгомжгүй ч 1974 оны долоодугаар сарын 20-нд Туркийн зэвсэгт хүчин Кипр арал дээрх үндэсний цөөнх болох турк гаралтай хүмүүсийг аврах нэрийдлээр дайран орж, хойд хэсгийг нь эзлэн авсан байдаг. Энэ хэрэг гарахаас өмнө арал дээр грек гаралтай кипрчүүд ба турк гаралтай кипрчүүдийн хооронд үндэстэн хоорондын мөргөлдөөн гарч байсан. Улмаар, 1974 оны долоодугаар сард Туркийг үзэн ядагч грек хэт үндсэрхэг үзэлтнүүд Кипр арал дээр төрийн эргэлт хийхэд Туркийн эрх баригчид турк цөөнхийг хамгаалах гэсэн шалтагаар цэргээ оруулсан түүхтэй. Кипр арал нь Европын холбооны гишүүн, грекчүүд гол төлөв амьдардаг хэсгийн Засгийн газрыг дэлхийн нийтээр арлыг бүхэлд нь "деюре" захирдаг гэж хүлээн зөвшөөрдөг ч "дефакто" буюу бодит байдал дээр арлын хойд хэсэг нь өөрийн зэвсэгт хүчин, засгийн газар, парламенттай тусгаар улс. Арлын хоёр хэсгийг заагласан шугамыг НҮБ-ын энхийг сахиулагчид хамгаалж байдаг.
Сэтгэгдэл (0)
Сэтгэгдэл бичигдээгүй байна