Туркменистанд тамхины хомсдол үүсэж, үнэ нь огцом өсөөд байгаа тухай "Радио Азатлык" мэдээлсэн байна. Тус радиогийн өмнөөс Туркменистанд нэрээ нууцлан ажилладаг сурвалжлагч нарын мэдээлж байгаагаар сүүлийн хэдэн өдрөөс улсын дэлгүүрүүдээр тамхи зарагдахаа байж, хувийн дэлгүүрүүдийн тамхины үнэ огцом өсжээ. Өмнө нь 40 манатаар зарагддаг байсан тамхины үнэ зарим газар 200 манат хүрч өссөн байна. Гэтэл энэ улсын цалингийн дундаж хэмжээ нь 790 манат. Иймд нутгийн иргэд аргагүйн эрхэнд тамхийг ширхгээр худалдан авдаг болжээ.
Туркменистаны Засгийн газар 2016 онд хайрт удирдагчийнхаа заавраар "Туркменистаны нутагт тамхи оруулж ирэх ба борлуулахыг цэгцлэх тухай" тогтоол баталж, тамхийг зөвхөн улсын дэлгүүрээр зардаг болгож байсан. Удалгүй буюу 2017 оны гуравдугаар сард хортой зуршлыг арилгах 2017-2025 оны үндэсний хөтөлбөрийг баталсан. Энэ хөтөлбөр ёсоор 2025 он гэхэд Туркменистан нь тамхигүй орон болох ёстой. Иймд тамхи ингэж огцом ховордож эхэлсэн нь эрх баригчид хөтөлбөрөөр хэрэгжүүлж эхэлсэнтэй холбоотой байж магадгүй юм байна.
Гэвч "Радио Азатлык"-ийн нууц сэтгүүлчдийн ярьж байгаагаар хөтөлбөр хэрэгжүүллээ гээд Туркменистан дахь тамхичдын тоо буураагүй. Хамгийн гол нь эрх баригчид хортой иргэдийг хортой зуршлаас салахад нь туслах ямар ч арга хэмжээ аваагүй аж.
Энэ зуур Туркменистаны Ерөнхийлөгч ГурбангулыБердымухамедов нь тус улсын төрийн мэдлийн долоон банкийг алабай үүлдрийн нохойг тусгайлан үржүүлж, сайжруулах ёстой "Туркмен алабай" аж ахуйн нийгэмлэгийн үүсгэн байгуулагч болохыг зөвшөөрсөн байна. Бердымухамедов нь алабай үүлдрийн тухай ном бичиж, алабайг Туркменистаны үндэсний баялаг гэж тунхаглан, энэ үүлдрийг төрийн хэмжээнд хамгаалалтад авч, үржүүлэхээр болж байсан нь ийнхүү хэрэгжиж эхэлж байгаа бололтой.
Сэтгэгдэл (0)
Сэтгэгдэл бичигдээгүй байна