Өчигдөр Туркийн Ерөнхийлөгч Эрдоган ОХУ-ын Сочид айлчлан Ерөнхийлөгч Путинтэй бараг 5 цагийн турш хэлэлцээ хийсний эцэст "онц сайн" тохиролцоонд хүрсэн тухайгаа мэдэгджээ . Туркийн Ерөнхийлөгч "150 цагийн дотор "Өөрийгөө хамгаалах хүч"-ний бүлэглэлүүд 30 км-ийн бүсийн цаана гарна. Энэхүү хугацааг маргааш 12 цагаас эхлэн тоолж эхэлнэ. Гаргаж өгсөн 150 цаг өнгөрсний дараагаар "Энхийн булаг" ажиллагаа явагдсан газраас өрнөд ба дорнод чиглэлүүдэд Турк ба Оросын цэргийн эргүүлүүд явж эхэлнэ. Эргүүлүүд Туркийн хилээс 10 км хүртэл гүн дэх Сирийн нутаг дээр явагдах болно" гэсэн байна.
Ингэснээр курдуудыг шахан хөөх явцад Туркийн арми нь Орос ба Сирийн Засгийн газрын армитай зэвсэгт мөргөлдөөн хийх эрсдэлгүй болж байгаа бололтой. Үүний өмнө буюу аравдугаар сарын 22-нд Эрдоган нь АНУ-ын Сирийн талаар өгсөн амлалтаа биелүүлсэнгүй гэж буруутгаж байсан юм. Америкчууд Туркийн армийн "Энхийн булаг" ажиллагаагаа 5 хоног түр зогсоо гэж ятгаад, энэ хооронд курдын зэвсэгт бүлэглэлүүдийг Туркийн хилээс 30 км-ийн зайтай бүсээс гаргана гэж амласан юм. Эрдоган нь Вашингтон амлалтаа биелүүлээгүй тул Туркийн арми алан хядагчидтай тэмцэхэд шаардлагатай арга хэмжээг авч магадгүй гэж мэдэгдэж байсан. Гэтэл "Reuters" агентлаг нь Сирийн зүүн хойд нутгаас курдуудыг гарсны дараа Туркийн арми "Энхийн булаг" ажиллагаагаа явуулах шаардлагагүй гэж үзэж байгаа тухай мэдээлсэн байна. "Reuters"-ын мэдээгээр Америкийн тал нь курдуудыг шаардлагатай хол зайнд хүртэл ухарсан гэдэгт Туркийн эрх баригчдыг итгүүлсэн тул Батлан хамгаалахын сайд нь "Энхийн булаг" ажиллагааг явуулах шаардлагагүй болсон гэж мэдээлсэн аж.
Туркийн "Энхийн булаг" ажиллагааг зогсоож курдуудыг хүн ялагдал, олон мянган хүнээ алдахаа аварсан баатар болсон улс хэн бэ гэдэг уралдаан яваад эхэлсэн бололтой.
Сэтгэгдэл (0)
Сэтгэгдэл бичигдээгүй байна