Германы Засгийн газраас хөдөө аж ахуйн салбарт авах гэж байгаа арга хэмжээнд дургүйцсэн фермерүүд эсэргүүцлийн арга хэмжээ зохион байгуулж байгаа тухай "DW" суваг мэдээлж байна. Германы Засгийн газар нь байгаль, ан амьтад, түүний дотор шавжийг хамгаалахад чиглэсэн багц хууль батлах гэж байгаа юм. Ийм олон хууль баталбал хөдөө аж ахуйн салбарт хэвийн ажиллах боломжгүй болно гэж Германы фермерүүд үзсэн байна. Эсэргүүцэл илэрхийлсэн фермерүүд трактороо хөдөлгөөн том хотуудын гудамж талбайг хааж, жагсаал хийсэн байна. Тухайлбал, Бонн хотноо гэхэд 10 мянган фермер, 2000 орчим трактор оролцон жагсаал болсон. Үүнтэй яг адил арга хэмжээг фермерүүд Берлин, Вюрцбург, Байройт, Эрфурт, Рендсбург, Ганновер, Ольденбург, Штутгарт, Фрейбург, Лейпциг, Гёрлиц зэрэг хотуудад зохион байгуулсан байна. Тухай бүрд фермерүүд трактороор зам хааж, том хотуудын гудамж талбайн хөдөлгөөнд ихээхэн гацаа үүсгэсэн байна.
Ийм өргөн хүрээтэй эсэргүүцлийн арга хэмжээний дараа холбогдох яам, албадын дарга нар фермерүүдэд санхүүгийн дэмжлэг үзүүлэх, уулзаж хэлэлцээ хийх боломжийн талаар яриад эхэлсэн байна. Тухайлбал, Хөдөө аж ахуй ба хүнсний сайд ЮлияКлёнкэр нь эсэргүүцэл илэрхийлж байгаа фермерүүдийн санаа зовж байгааг ойлгож байгаагаа мэдэгдээд тэдэнд санхүүгийн дэмжлэг үзүүлэх арга хэмжээ авах тухай мэдэгдэж. гэхдээ Хөдөө аж ахуйн салбарт бүх үйл ажиллагааг байгаль орчин, ан амьтан, шувуу шавж бүгдэд ээлтэй байдлаар явуулдаг болгон өөрчлөх цаг ирээд байгааг онцолжээ. Мөн Хүрээлэн буй орчин ба цөмийн аюулгүй байдлын сайд СвеньяШульце нь фермерүүдийн үйл ажиллагаанаас болоод нугын шувуудын тоо эрс цөөрч байгааг сануулаад тариачид, фермерүүдэд туслалцаа үзүүлэх талаар хэлэлцээ хийхэд бэлэн ч ирээдүйд фермийн үйл ажиллагааг байгаль орчинд ээлтэйгээр явуулах ёстой гэдгийг бас онцолжээ.
Сэтгэгдэл (0)
Сэтгэгдэл бичигдээгүй байна