Японы Засгийн газрын Эдийн засаг, худалдаа, аж үйлдвэрлэлийн сайд ИссюСугавара нь сонгогчдодоо авлига өгсөн гэх дуулиант мэдээнээс болж өөрийн хүсэлтээр огцрох хүсэлт гаргасан тухай "Japan Times" мэдээлж байна. "Shukan Bunshun" гэдэг долоо хоног тутмын сонин дээр сайдын туслах нь нэг сонгогчид 20 мянган иен дамжуулж өгсөн, бусад сонгогчдод олон жилийн турш хулуу, далайн бүтээгдэхүүн зэрэг эд зүйл бэлэглэн авлига өгч байсан тухай мэдээлэл хэвлэгдэн гарсны дараа энэ бүхэн болсон гэж байна.
Японы Ерөнхий сайд СинзоАбэ нь сайдынхаа огцорч байгааг хүлээн авсан бөгөөд авлигын хэрэгтэй хүнийг сайдын суудалд суулгасан хариуцлагыг өөрөөсөө зайлуулахгүй гэж мэдэгджээ. Огцорсон сайд нь Засгийн газар дахь ОХУ-тай эдийн засгийн харилцааг хөгжүүлэх асуудлыг давхар хариуцаж байжээ. Оростой энхийн гэрээ байгуулж Умард газар нутаг гэгддэг Курилын арлуудыг эргүүлэн авах нь СинзоАбэгийн Засгийн газрын нэн тэргүүний зорилтын нэг. Японд маргаантай арлуудыг буцаан авахын тулд Оростой эдийн засгийн харилцаагаа улам хөгжүүлэх хэрэгтэй гэж үздэг аж. Өөрөөр хэлбэл Японы Ерөнхий сайдын тун итгэлт, нөлөө бүхий хүн сонгогчдоо хулуу өгсөн гэх ялихгүй хэрэгт орооцолдсон байж магадгүй гэсэн сургаар өөрийгөө цаашид өндөр алба хаших эрхгүй гэж үзсэн байна.
Сэтгэгдэл (0)
Сэтгэгдэл бичигдээгүй байна