Туркийн Ерөнхийлөгч Режеп Тайип Эрдоган цаашдаа шаардлагатай гэж үзвэл Сирийн хойд нутаг дахь аюулгүй бүсийг тэлэх арга хэмжээ авна гэсэн байна. Туркийн NTV сувгийн мэдээлж байгаагаар Эрдоган "Би анхааруулж байна. Бид гаднын халдлагын хариу өгөх тул шаардлагатай гэж үзвэл аюулгүйн бүсийг тэлэх болно" гэжээ. Түүнчлэн арваннэгдүгээр сарын 13-нд АНУ-д албан ёсны айлчлал хийх талаар эцсийн шийдвэр гаргаагүй байгаагаа хэлсэн байна. Учир нь, АНУ-ын Конгрессын төлөөлөгчдийн танхим Османы эзэнт гүрний үед туркуудармен үндэстнийг үй олноор нь хомроглон устгаж байсныг хүлээн зөвшөөрсөн тогтоол баталсан юм.
Түүнчлэн АНУ-ын Конгресс нь Туркийг Америкийн зөвшөөрөлгүйгээр Сирийн хойд хэсэгт цэргийн ажиллагаа явуулсан, Оросоос С-400 зенитийн пуужингийн систем худалдан авлаа гэж хориг арга хэмжээ авахыг дэмжсэн юм.
Эрдоган нь Трамптай зөрчилдсөн ч Путинтэй зөвшилцөөд аравдугаар сарын 22-оос эхлэн "Энхийн булаг" ажиллагаагаа зогсоож, Сирийн Засгийн газрын арми ба Оросын цэргийн цагдаа нарыг хойд нутаг руу орж, курдуудыг Туркийн шаардсан 32 км-ийн аюулгүй бүсээс гаргахыг зөвшөөрсөн юм. Энэхүү аюулгүй бүсийг дагуу Туркийн цэрэг ба Оросын армийн цагдаа нар хамтарсан эргүүл хийж байхаар болсон нь АНУ болон НАТО-ийн уур хилэнг ихэд хүргэсэн. Зарим оронд Туркийг НАТО-оос хасах тухай ч яригдаад эхэлсэн аж.
Сэтгэгдэл (0)
Сэтгэгдэл бичигдээгүй байна