КИБЕР ЛУЙВАРЧИД ОРОСЫН ИРГЭДЭЭС 2 ТЭРБУМ РУБЛЬ ЗАВШЖЭЭ

ОХУ-д 2018 онд кибер луйварчид иргэдийн данснаас 2 тэрбум луйвар завшсан тухай "Интерфакс" мэдээлж байна. Оросын Олон нийтийн танхимын интернэт хэрэглэгчдийн эрх ашгийг хамгаалах ажлын бүлгийн тэргүүн А.Малькевич нь энэ талаар "Нийт учирсан хохирлын хэмжээ нь 2 тэрбум рубль гэхээр кибер гэмт хэргийн далайц нь ойлгомжтой болно. Үүнээс 1,5 тэрбум рублийг интернэт банкинг ашиглан луйвардаж авсан байгаа юм" гэжээ.

Оросын жирийн иргэдийг залилахын тулд луйварчид дийлэнх тохиолдолд хуурамч бүртгэл дээр авсан сим карт ашиглан ухаалаг утсаар дамжуулан гэмт хэрэг үйлддэг гэдгийг А.Малькевич онцолсон байна. Луйварчид утсаар банкны хамгаалалтын албанаас ярьж байна гэж мэхлэн нууц үгийг нь залилан аваад дансыг нь хоосолдог аж. Ийм аргаар 2018 онд Орост 206 мянган кибер луйврын гэмт хэрэг үйлдэгдсэнээс ердөө 35 мянгыг нь илрүүлсэн аж. Луйварчдад итгэн интернэт банкны нууц үг, хэрэглэгчийн нэр зэргээ алдсан хэрэглэгчид нэг удаад 100 мянгаас 500 мянга хүртэл рублийг алдаж байсан байна. Энэ луйвартай тэмцэхийн тулд 2019 онд Оросын Төв банкнаас янз бүрийн санхүүгийн байгууллагын нэр барьж, иргэдээс нууц мэдээллийг нь авахыг завдсан 2,5 мянган дугаарыг үүрэн телефоны операторуудад дамжуулан арга хэмжээ авхуулж байжээ. Эдгээр дугааруудыг нарийвчлан шалгахад 189 тохиолдолд дугаарыг орлуулан хуулбарласан байжээ. Иймд банкны хамгаалалтын албанаас хэзээ ч хэрэглэгчид рүү утсаар ярьж, нууц үг, хэрэглэгчийн нэвтрэх нэр зэргийг асуудаггүй талаар анхааруулга тараадаг ч энэ төрлийн гэмт хэргийн тоо буурахгүй байгаа аж.

Батлагдаагүй мэдээллээр ийм төрлийн гэмт хэргийг хорих газар ял эдэлж байгаа хэрэгтнүүд олноор үйлддэг юм байна.