Америкийн Висконсин мужийн Меномони хотын оршин суугч сугалаагаар асар их мөнгө хожсоныхоо дараа 28 жилийн өмнө өгсөн амлалтаа санаж, хэлсэн үгэндээ хүрдэг хүн гэдгээ харуулсан тухай “UPI” мэдээлж байна.
Томас Кук гэдэг азтай эр сугалаагаар 22 сая доллар хожжээ. Асар их мөнгө хожсон гэдгээ мэдсэн Томас нь мөнгөө авах гэж яарсангүй, 1992 онд найз Жозеф Финитэй тавьсан андгайгаа санаад түүн рүү утсаар ярьжээ. Томас Кук, Жозеф Фини хоёр нь 28 жилийн өмнө хэн нэгэн нь нэгэн цагт сугалаагаар гол шагналыг нь хожвол найзтайгаа хуваана гэж андгай тавьсан юм байжээ.
Жозеф Фини найзыгаа утсаар ярихад нь итгэлгүй, даапаалж байна гэж уурласан тухайгаа сэтгүүлчид ярьсан байна.
Кук ба Фини хоёр нь шагналаа бага багаар олон жилийн турш цувруулж авах ёстой байсан ч суутгал төлөөд бөөнөөр нь авсан нь дээр гэж үзжээ. Ингэснээр бүх татвар, суутгал төлсний дараа гар дээрээ тус бүр 5,7 сая доллар бэлнээр авчээ.
Кук нь их мөнгө хожсон тул ажлаасаа гараад гэр бүлтэйгээ тааваараа өнгөрөөдөг болно гэж шийдсэн байна. Тэрээр “Одоо бид юу хүссэнээ хийх боломжтой боллоо. Тэтгэвэртээ гарах үүнээс сайхан боломж гэж юу байх билээ” гэжээ.
Сэтгэгдэл (0)
Сэтгэгдэл бичигдээгүй байна