“АНУ-ын Сейнт-Жойс хотын “Скандинавын хан боргоцой” зочид буудал үүдэндээ өргөсөн Норвегийн далбааг “Black lives matter” хөдөлгөөнийг дэмжигчид арьсны өнгөөр гадуурхагч Өмнөд мужуудын холбооныхтой андуурч эздэд нь заналхийлэх болсон тухай “Lansing State Journal” мэдээлсэн байна.
Зочид буудлыг ажиллуулдаг эхнэр, нөхөр Оффенбекерүүд нь Норвегоос гаралтай өвөөгөө дурсан буудлынхаа үүдэнд Норвегийн далбааг, Америкийн далбаатай хамт өргөдөг байж. Норвегийн далбаа нь халь харахад Америкийн иргэний дайны үед боол эзэмшигч, арьсны өнгөөр ялгаварлагч Өмнөд мужуудын холбооны далбаатай адил. Иймд хааяа нэг хүмүүс Өмнөд мужуудын холбооны тугтай андуурч уурлавал даруй ялгааг нь зааж, тайлбарлаад тайвшруулдаг байсан аж. Гэтэл “Black lives matter” хөдөлгөөн гарсны дараанаас тэднийг санаатайгаар Өмнөдийн арьсны өнгөөр гадуурхагчидтай адил төстэй далбаа өргөлөө гэж шүүмжлэх болсон байна. Зарим нь шүүмжлээд зогсохгүй амь насанд нь заналхийлсэн, арьсны өнгөөр гадуурхагчид гэж буруутгасан олон арван захидал ирэх болжээ. Үүнээс болоод Оффенбекер нар Норвегийн далбааг зочид буудлынхаа үүдэнд ахиж өргөхгүй гэдгээ албан ёсоор мэдэгджээ.
Америкт 1861-1865 онуудад дэгдсэн иргэний дайны үеэр боол эзэмшигч, арьсны өнгөөр гадуурхагч Өмнөд мужуудын хамтын холбоо ба Умардын талынхан хоорондоо дайтсан. Энэ дайнд өмнөдийнхөн ялагдаж, Америк даяар боолчлолыг албан ёсоор халсан түүхтэй. Гэсэн хэдий ч Америкийн өмнөд мужуудад ялагдсан холбооны туг далбааг хүндтэгдэж, ёслол арга хэмжээ зэрэгт ашигласан хэвээр байдаг. Зарим америкчууд үүнийг арьсны өнгөөр гадуурхагчдыг дэмжсэн хэрэг гэдэг бол өөр зарим нь Өмнөд мужуудын далбаа нь АНУ-ын түүхийн салшгүй хэсэг тул олон нийт мэддэг байх ёстой гэж үздэг аж.
Сэтгэгдэл (0)
Сэтгэгдэл бичигдээгүй байна