2020/08/14
USD 2,811

АНУ 2021 оны таван сард Афганистанаас цэргээ гаргаж дуусна

З.Гантулга
2020/07/31

АНУ-ын Төрийн нарийн бичгийн дарга Майкл Помпео нь Конгрессын Сенат дах Олон улсын асуудал хариуцсан хороонд илтгэл тавихдаа Афганистан дах цэргээ дараа жилийн тавдугаар сар гэхэд бүрэн гаргаж дуусна гэдгийг мэдэгджээ. Тэрээр Америкийн цэргийг Афганистанаас гаргаж дуусах хугацааны талаарх асуултад хариулахдаа  “Бид тохиролцоо байгуулсан. Бид цэргээ тэндээс бүрэн гаргаж тэг болгоно. Дараа жилийн тавдугаар сар гэхэд болох байх” гэжээ. Түүнчлэн АНУ нь Афганистаны асуудлыг энхийн замаар зохицуулах, эвлэрэлд хүргэх явцыг эхлүүлсэн гээд Афганистан дах сөргөлдөгч талуудын хооронд бүрэн дүүрэн харилцан яриа явагдана гэдэгт найдаж байгаагаа илэрхийлсэн байна.

АНУ нь энэ оны хоёрдугаар сард Катарын Доха хотноо Афганистаны “Талибан” бүлэглэлтэй энхийн гэрээ байгуулсан юм. Гэрээ ёсоор АНУ ба түүний холбоотнууд нь 14 сарын дотор цэргээ Афганистанаас бүрэн гаргаж дуусах ёстой. Хариу болгож талибууд нь Афганистаны нутгийг АНУ ба түүний холбоотнуудад аюул учруулахуйц үйл хэрэгт ашиглахгүй гэж амласан. Мөн Афганистан Засгийн газар ба Талибаны хооронд байнгын бөгөөд бүгдийг хамарсан гал зогсоох хэлэлцээг эхлүүлэхийн өмнө тус бүлэглэлийг дэмжигч 5000 хүнийг шоронгоос суллаж, талибууд нь Засгийн газрын талын 1000 орчим хүнийг суллахаар тохиролцоод байгаа аж.


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна