2020/10/30
USD 2,811

Киргизийн ерөнхийлөгч огцорч, Садир Жапаровын үе ирлээ


Киргиз улсад  энэ сарын 11-нд болсон парламентын сонгуулийн дараа үймээн дэгдсэн. Парламентад суудал аваагүй 12 нам олон нийтийг уриалан жагсаал зохион байгуулж,  Төрийн ордноо эзэлж, тэмцлийн үр дүнд сонгуулийн дүнг хүчингүй болгосон тухай бид өмнө нь мэдээлж байсан. Улмаар энэ сарын 21-нийг хүртэл Бишкек хотод онц байдал зарласан билээ.  Ингэснээр  хотын бүх хөдөлгөөнийг хянаж, цэргийн хатуу хязгаарлалт тогтоов. Мөн Садир Жапаровыг  шинэ ерөнхий сайдаар томилсныг “Тасс” агентлаг мэдээлэв. Засгийн газрын удирдагчаа барьцаалсан хэргээр 2013 онд шоронд хоригдсон Жапаровыг жагсагчид суллаж, ерөнхий сайдаар томилсон нь энэ юм. Жапаров томилогдсоныхоо дараа “Би Засгийн газрын ажлыг бүгдийг нь хариуцна. Намайг томилогдсоны дараа огцорно гэдгээ ерөнхийлөгч Сооронбай Жээнбеков амласан” хэмээн ярьсан байдаг.

 Тэгвэл Киргизийн ерөнхийлөгч Сооронбай Жээнбеков ч амласандаа хүрч, огцрох шийдвэр гаргаж буйгаа мэдэгдээд байна.  Тэрээр  “Цэргийн албан хаагчид, хууль сахиулах байгууллагууд төрийн ордныг хамгаалахын тулд зэвсэг ашиглах ёстой. Ийм тохиолдолд цус урсах нь гарцаагүй. Өдөөн хатгалгад автахгүй байхыг би талуудад уриалж байна. Надад  Киргизид энхтайван байдал, улс орны бүрэн бүтэн байдал, ард түмний нэгдмэл байдал бүхнээс чухал. Иргэн бүрийн амьдралаас илүү үнэ цэнэтэй зүйл гэж үгүй. Би эрх мэдлийн араас зууралдаагүй. Цус урсгаж, ард иргэд рүүгээ гал нээсэн ерөнхийлөгч болж Киргизийн түүхэнд үлдэхийг хүсэхгүй байна. Иймд албан тушаалаасаа огцрох шийдвэр гаргалаа” гэж  мэдэгдэв.

Ингэснээр дараагийн ерөнхийлөгч томилогдтол Садир Жапаров түр орлон гүйцэтгэгчээр ажиллахаар болж байна. Жапаровын улс төрийн карьер 2005 онд болсон төрийн эргэлтийн үеэр эхэлсэн байна. Ерөнхийлөгч асан Курманбек Бакиевийн үед тэрээр депутат, ерөнхийлөгчийн зөвлөх, Авлигаас урьдчилан сэргийлэх агентлагийн дарга байжээ. 2010 оны төрийн эргэлтийн дараа Атамбаевын үед Жапаров мөн депутат байсан. Хожим нь шүүх, хууль эрх зүйн асуудал эрхэлсэн мэргэжлийн хорооны даргаар томилогдсон байдаг.  Жапаров 2013 онд Каракольд (тус улсын хойд хэсэг) Кумторын алтны уурхайг улсынх болгохыг шаардсан жагсаал зохион байгуулсан хэргээр 2017 оноос хойш шоронд хоригдож байжээ.

Эх сурвалж: “Зууны мэдээ” сонин

2020.10.19 ДАВАА № 201 (6426)


Сэтгэгдэл (4)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
80.92.245.24 |   2020/10/21
Baylagiin haraal gej uuniig heleed baigaa youm. ard tumniig ni turhirchihaad uls orniig ezenguiduulen baylagiig tsolmoch technology gej...
Хариулах
192.82.69.8 |   2020/10/19
Аливаа мэдээллээс чухлыг онцолж сураач. Энд бичсэнээр бол Кумторын орд газрыг улсын хяналт мэдэлд авахуулахаар тэмцэж байгаад ял авсан гэжээ. Кумторын алтны орд бол яг манай Бороо шиг, Оюутолгой шиг аймшиг шүү дээ.
Хариулах
202.126.89.173 |   2020/10/19
Монгол ч гэсэн ялгаа байхгүй
Хариулах
103.57.93.10 |   2020/10/19
Гүндалай, Фэншүй Ганбаа шиг баагий Киркизыг удирдахаар чинь бүүр дампууруулна гэсэн үг. Нэг эмэгтэй ерөнхийлөгч байсан тэр нь л гайгүй нөхөр байсан даа. Түрэг гаралтай баагийнуудад ардчилал тохирохгүй бол дарангуйлагдаад байж байхдаа таарсан.
Хариулах