2016 онд Муртаза Ахмади гэдэг афган жаал хөлбөмбөгийн од, Аргентины Лионел Месситэйуулзсанаар дэлхий даяар танил болоод авсан. Дийлэнх нь энэ түүхийг мартсан тул эргэн сануулахад илүүдэхгүй байх.
Афган хүү ердөө таван настай байхдаа олон улсад нэр алдартай болсон. Дэлгүүрийн гялгар уутан дээр Мессигийн нэрийг 10 дугаарын хамт бичиж зүүсэн Муртаза хүүгийн зургийг ах нь “Facebook” дээр байршуулснаар хүн бүр лайк дарах болсон. Удалгүй алдарт Месси хүүгийн зургийг олж хараад түүнтэй Катарын нийслэл Дохад болсон “Барселона” ба “Аль-Ахли” хоорондын нөхөрсөг тоглолтын дараа хүүтэй уулзсан.
Дэлхийн спортын супер од, Афганы ядуу хүү хоёрын уулзалтыг дэлхий даяар сонирхож байсан ч олон нийтийн сүлжээнд ямар ч мэдээлэл гялс хийгээд мартагддаг жамаар удалгүй мартагдсан. Харин Британийн “Bleacher Report” сониныхон энэ хоёрдугаар сарын 2-нд Муртаза хүүтэй уулзаж, нийгмийн сүлжээнд од болсноос хойш амьдрал нь яаж өөрчлөгдсөнийг сонирхож. Тэгтэл...
Муртаза хүүгийн гэр бүл нь “Барселона” багийн ахлагч Месси түмний нүдэн дээр хүүг тэвэрч хүндлэл үзүүлсэнд хязгааргүй их баярлаж байсан. Гэвч төд удалгүй яг энэ тохиолдлоос болж гэр бүлийнх нь амьдрал, ялангуяа хүүгийн амьдрал там болж хувирна гэж төсөөлөөгүй байжээ. Месси зүгээр л уулзаад өнгөрсөн бол бүх зүйл сайхан болох байсан ч гай болж хүүд бэлэн явуулснаар бүгдийг баллаж хаясан тухай Муртазагийн ах сонынхонд ярьжээ.
Учир нь, Мессигийн хүүд бэлэг ирүүллээ гэхээр нь хөөрхий ар гэр нь, тэдний хөршүүд ч мөнгө явуулжээ гэж бодсон байна. Саятан одоос дараагийн удаад хүүд өөрийнх нь нэртэй цамц худалдаж авч өгөөрэй гэж хэдэн доллар явуулсан байх гэтэл тийм зүйл байсангүй. Бэлгийн хайрцаг дотор хөлбөмбөгийн бөмбөг бас Аргентины шигшээ багийн цамц хоёр л байж. Ингээд өнгөрч болох байтал бэлэг ирсэн гэдгийг бүгд мэдэж байсан тул улам даамжирчээ.
Таних танихгүй бүгд л Муртазагийн гэр бүлийг саятан Мессигээс илгээмжээр асар их мөнгө авсан тухай цуурах болжээ. Янз бүрийн хүмүүс мөнгө зээлэхийг гуйж эхэлсэн бол нутгийн эрүүгийн хэрэгтнүүд хувь нэхэн заналхийлж, зарим нь хүүг хулгайлахаар айлгах болжээ. Ийм нөхцөлд хүүгийн аав нь улс төрийн орогнол хайн барууны орнуудын ЭСЯ-д хандсан ч бүгд татгалзсан байна. Хүүгийн эцэг энэ талаар ярихдаа “Бид Мессийг Роналдушиг байна гэж бодож байсан. Тэгээд Мессигийн хүүгийн төлөө жаахан ч гэсэн юм хийгээсэй гэж Доха хүртэл явсан ч тэр Муртазагийн төлөө юу ч хийгээгүй” гэж гомдолложээ.
Ингээд заналхийлэл сүрдүүлэгтэй тулгарсан Муртаза хүү сургуульд явахаа байсан төдийгүй гэрээсээ ч гарч чадахгүй болжээ. Гэрийнхэн нь аргаа бараад хүүг хэн ч танихгүй Кабул руу, авга ахынх руу явуулсан ч нийслэлд цуврал алан хядах ажиллагаа болсны дараа арга буюу нутагтаа харьж иржээ. Муртаза хүү энэ талаар ярихдаа “Тэнд байнга л юм дэлбэрч байдаг. Надад тоглох газар байхгүй, найз нар байхгүй” гэжээ. Гэхдээ хүү хөлбөмбөгт, Мессид үнэнч хэвээр гэдгээ нотолж “Би Мессийгбиширдэг болохоор ахиад хөлбөмбөгийн цамцаа өмсөнө” гээд юунд ч харамсахгүй байгаа тухайгаа сэтгүүлчид ярьсан байна.
°C
Сэтгэгдэл (17)