АНУ-ын Флорид мужийн Олдсмар нэртэй жижиг хотын ундны ус шүүх станцад хууль бусаар нэвтэрсэн хакер усыг хордуулах гэж оролдсон байна. Энэ тухай тус хотыг багтаадаг Пинелаас тойргийг шериф Боб Гуалтиери нь хэвлэлийн бага хурлын үеэр мэдээлжээ.
Шерифийн мэдээлснээр үл мэдэгдэх этгээд хотын цэвэр усны шүүлтийн системд өглөө 8 цагийн үед нэвтрээд удалгүй буцаж гарахыг тухайн үед станц дээр жижүүрлэж байсан оператор анзаарч бүртгэн авсан байна. Үүнээс таван цагийн дараа хакер ус цэвэрлэх станцад ахин холбогджээ. Энэ удаад тэрээр станцын нэг компьютерын курсорыг зайнаас удирдан усны цэвэрлэгээг хянадаг программыг өөрчилж, ус дамжуулах шугамд бага хэмжээгээр хийдэг NaOH буюу натрийн гидроксидыг зөвшөөрөгдсөн хэмжээнээс 100 дахин их болгосон байна. Усанд их хэмжээгээр орсон NaOH нь хүний арьсыг цочроох, түлэх гэх мэт таагүй үр дагавартай байдаг.
Харин энэ бүхнийг ажиглаж байсан станцын оператор нь тохиргоог буцаан хэвийн болгож, хотын иргэдийг хамгаалсан байна. Олдсмар хотын 15 мянган оршин суугчдаас хохирсон хүн гараагүй. Энэ халдлагын дараа ундны ус шүүх станцын алсын зайн удирдлагыг унтраасан байна.
°C
Сэтгэгдэл (2)