Саятан эмэгтэй өв хөрөнгийг нь үрсэн ач нараасаа нөхөн төлбөр авчээ

Америкийн Флорид мужид амьдардаг 94 настай БеверлиШоттенстайн гэгч эмээ, олон саяын өв хөрөнгийг нь захиран зарцуулж байсан ач нараасаа нөхөн төлбөр гаргуулахаар болсон тухай “Bloomberg” агентлаг мэдээлжээ. 

 Санхүүгийн арбитрын шүүхээс ах дүү Эван ба АвиШоттенстайн нарыг эмээ Беверли Шоттенстайндаа 19 сая долларын нөхөн төлбөр өгөх ёстой гэж шийдсэн байна. Уг нь эмээгийн хуульчид шүүхэд хандахдаа 69 сая долларын нэхэмжлэл гаргаад байсан учир хоёр ач харин ч бага төлбөрт унасан аж.

 Беверли нь 15 жилийн өмнө Эван ба Ави гэдэг хоёр ачдаа 80 сая долларын өв хөрөнгөө захиран зарцуулах эрх өгсөн байж. Гэтэл ач нар нь эмээгийнхээ өмнөөс эрсдэл ихтэй наймаа хийж, 90 гарсан хүн өгөөжийг нь авах боломжгүй урт хугацааны хөрөнгө оруулалт хийх, өндөр урамшуулал авахын тулд эмээгийнхээ гарын үсгийг хуурамчаар үйлдэж гэрээ байгуулах зэрэг зүйлс хийж байжээ. Энэ хэрэг олны анхаарлыг татсан учраас ах дүү хоёрын хийсэн санхүүгийн зарим гүйлгээг Нью-Йоркийн прокурорууд сонирхоод эхэлсэн гэж байна.

 Беверли өв хөрөнгийг нь хоёр ач нь үрэн таран хийж байгааг мэдмэгцээ тэдний үйлдэл бүрийн нарийн бүртгэн бүтэн жилийн турш тэмдэглэл хөтөлж байгаад өмгөөлөгчдөө хандсан ажээ. Тэрээр ач нараасаа нөхөн төлбөр авах болсон талаар ярихдаа “Энэ ямар 25-хандолларын тухай яригдаж байгаа биш. Ингэх хэрэгтэй байсан юм” гэжээ.