Clubhouse-аар DeFacto Д.Жаргалсайхан ЭМ-ийн сайд С.Энхболдтой ярилцлаа. Энэ үеэр ЭМ-ийн сайд С.Энхболд: Манай улс хоёрдугаар сарын 23-наас эхлэн вакцинжуулалтыг эхлэх бөгөөд эхний ээлжинд БНЭУ-аас “AstraZenecа” вакцин 150 мянган тун Даваа гаригт ирнэ. Эхний ээлжинд 150 мянган тун вакцинаар эмч, тусгай албан хаагчдыг хамруулна. Нийт хүн амынхаа 60 хувийг вакцинжуулахаар зорьж байна. Төр болон хувийн хэвшлийн эрүүл мэндийн ажилтан 56 мянган хүн хариу арга хэмжээнд ажиллаж буй алба хаагчид буюу цэрэг, цагдаа, хил хамгаалах салбарын 53 мянга орчим, 50 ба түүнээс дээш насны өндөр настан, архаг хууч суурь өвчтэй, эрхтэн шилжүүлэн суулгуулсан, гемодиализийн аппаратад ордог хүмүүсийг эхний ээлжинд хамруулахаар төлөвлөсөн. 2021 онд багтаж нийт хүн амын 60 хувьд тус бүр хоёр тун вакцин хийнэ гэсэн төлөвлөгөө гаргасан. Үүнтэй холбогдох хөрөнгийг ч мөн шийдвэрлэсэн. Дэлхийн банкнаас 51 сая ам.долларын хөнгөлөлттэй зээл авсан. Засгийн газраас вакцинжуулалттай холбоотойгоор 226 тэрбум төгрөгийг баталсан. Улсын нийт иргэнээ үнэ төлбөргүй вакцинжуулна гэж хуульд заасны дагуу хийгдэх юм.Вакцинжуулалтын хоёр тундаа хамрагдсан иргэдийг хурууны хээ, иргэний үнэмлэхийн QR кодыг идэвхижүүлж гадаад улсад зорчих карт, сертификат олгох технологийн шийдлийг хийхээр ажиллаж байна гэв.