Л.Халтар: Баруун болон зүүн босоо чиглэлийн төмөр замыг үргэлжлүүлэн барих шийдвэр гарлаа

"Засгийн газрын өнөөдрийн хуралдаанаар Монгол улсын төмөр замын салбарт төрөөс хэрэгжүүлэх бодлогын бичиг баримтын хэрэгжилтийн үргэлжлэл, баруун болон зүүн босоо чиглэлийн төмөр замыг барих ажлыг үргэлжлүүлэх шийдвэр батлагдлаа. 

Зам, тээврийн хөгжлийн сайд Л.Халтар "Үүнийг концессын хэлбэрээр гүйцэтгэнэ. Монголын Төмөр зам компани бусад сонирхогч талтай хамтран тусгай зориулалтын компани байгуулж, ТЭЗҮ, зураг төсөл боловсруулах, барих, ашиглах, шилжүүлэх зэрэг концессын нөхцөлөөр төмөр замыг барьж, тодорхой хугацааны дараа монголын төрд шилжүүлнэ. 

Энэ тогтоолын төсөл батлагдсантай холбогдуулан хөрөнгө оруулагчдад уриалахад энэ ажил дээр ирж оролцохыг урьж байна. Одоогийн байдлаар гурван том төсөл хэрэгжиж байна. 

Энэ нь Тавантолгойгоос Зүүнбаян чиглэл, Тавантолгойгоос Гашуунсухайт чиглэл, Өнгөрсөн долоо хоногт эхэлсэн Зүүнбаянгийн төмөр замаас Хангийн чиглэл юм.

Баруун босоо чиглэлийн төмөр замын бодлогын бичиг баримт батлагдсанаар эхний ээлжид 1,255 орчим километр буюу Арцсуурь-Нарийнсухайт-Шивээхүрэн, харин зүүн босоо чиглэлд Чойбалсан-Хөөт, Хөөт-Бичигт маршрутаар 426.6 километр үргэлжлэх зам барих урьдчилсан төлөвлөгөө байгаа" гэдгийг хэллээ.