Жил бүрийн хавар махны үнэ өсдөг. Харин энэ жилийн хувьд бензин шатахууны үнэ өсчихөөд байгаа ч өмнөх онуудтай харьцуулахад махны үнэ харьцангуй тогтвортой байгаа нь нийслэлийн Статистикийн газрын судалгаанаас харагдаж байна. Тодруулбал, өнгөрсөн оны дөрөвдүгээр сард үхрийн ястай мах кг нь 14 мянган төгрөгийн үнэтэй байсан бол энэ жилийн мөн үед 14000-14500 төгрөг байна. Хонины мах үүнээс 1000-1500 төгрөгөөр хямд байгаа нь өнгөрсөн оны мөн үеэс кг тутамдаа 300-500 төгрөгөөр нэмэгдсэн дүн мэдээ юм. Энэ бол зах, худалдааны төвөөр худалдаалагдаж буй махны жижиглэнгийн үнэ. Үүний зэрэгцээ нөөцийн мах үлүү хямд буюу үхэр кг нь 8900, хонь 8300, ямаа 7100 төгрөгөөр худалдаалагдаж ирсэн.
Засгийн газрын хуралдаанаар нөөцийн хонины махны үнийг кг тутамд 350 төгрөгөөр хямдруулах шийдвэр гаргаснаар хонины нөөцийн мах кг нь 7950 болж хямдарч байна. Мөн гулуузаар авбал илүү хямд буюу 7750 төгрөгөөр худалдаалахаар болсныг ХХААХҮ-ийн сайд З.Мэндсайхан мэдэгдсэн юм. Бага килограмм мах худалдан авахад үнийн дээрх хямдрал чамлалттай байж мэдэх ч гулуузаар авах үед чамгүй хэмнэлт гарахаар байна гэж иргэд ам сайтай байна. ХХААХҮЯ-наас нөөцийн махыг долоо хоног бүрийн баасан, бямба, ням гарагуудад гулуузаар зарах, цэгийн тоог нэмэх зэрэг зохион байгуулалтыг хийж байна.
Гадаад хүчин зүйлийн нөлөөгөөр дэлхийн бүх улс орон сүүлийн хэдэн арван жилд тохиогоогүй инфляцийн өсөлтөд нэрвэгдээд байна. Энэ үед манай орны нөхцөлд Засгийн газар “Гол нэр төрлийн бараа бүтээгдэхүүний үнийн өсөлт, хомсдолоос сэргийлэх, сөрөг нөлөөллийг бууруулах тухай” хуулийг УИХ-аар батлуулсан нь бараа бүтээгдэхүүний үнийг огцом буулгах гэхээсээ илүү дахин өсгөхгүй байхаас сэргийлэх боломжит хувилбар гэж эдийн засагчид үзэж байгаа юм.
Эх сурвалж: Нийслэлийн Статистикийн газар
Сэтгэгдэл (0)
Сэтгэгдэл бичигдээгүй байна