УИХ-ын нэгдсэн чуулганаар Монгол Улсын 2023 оны хөгжлийн төлөвлөгөө батлах тухай УИХ-ын тогтоолын төслийг хэлэлцэх эсэх асуудлыг хэлэлцэж байна.
Энэ үеэр УИХ-ын гишүүн Б.Бат-Эрдэнэ: Газрын тос боловсруулах үйлдвэрийн талаар УУХҮ-ийн сайд Г.Ёндонгоос тодруулав. Тэрээр хариулахдаа "Газрын тос боловсруулах үйлдвэрийн бүтээн байгуулалтын ажил хийгдэж байна.Нийт таван багц ажлаас бүрдэж байгаа. Энэтхэгийн 178 хүн, туслан гүйцэтгэх монгол компанийн 387 хүн нийт 570 хүн газар дээр нь ажиллаж байна. Өнөөдрийн байдлаар EPC-1 гэрээний гүйцэтгэл 61 хувьтай байна. EPC-2 гэрээг 2021 оны дөрөвдүгээр сард, EPC-3 гэрээг 2021 оны тавдугаар сард БНЭУ-ын Экзим банкнаас ирсэн хураангүй жагсаалтын хүрээнд ГТБҮ-ээс төслийн бичиг баримтыг боловсруулан хүргүүлсэн. Гэрээний ёсоор БНЭУ-ын тал 2021 оны долдугаар сараас өмнө тендер зарлах ёстой байсан боловч EPC-2 гэрээн дээр таван удаа, EPC-3 гэрээн дээр долоон удаа хугацаа сунгах хүсэлт гаргасан. Ингээд тендерийн материалыг хүлээн авч зарласан боловч ТЭЗҮ-д зааснаас хэт өндөр ирсэн. Тиймээс БНЭУ-ын Экзим банкийг урин авчирч хэлэлцээр хийж байна. Хэлэлцээрийн хүрээнд тендерийн үнийг зөвшөөрөгдсөн хэмжээнд оруулахаар хэлэлцсэн. EPC-ийн тендер зарлагдсан. Дамжуулах хоолойн тендер гэрээ байгуулагдсан. Бүтээн байгуулалтын 530 км газар Тосон уулын талбайгаас хийгдэнэ. Бүтээн байгуулах тал 32 сарын хугацаанд хийнэ. Энэ 530 км зайд 1.5 сая тонн түүхий тос тээвэрлэнэ. Тосон уулаас Алтанширээ дахь ГТБҮ рүү 530 км тээвэрлэгдэнэ гэж ойлгож болно" гэв.
Дараа нь УИХ-ын дарга Г.Занданшатар "Хамгийн гол нь 2024 онд энэ үйлдвэр ашиглалтад орох уу та үүнийг толгойгоороо хариуцах уу" гэж асуув. Үүнд УУХҮ-ийн сайд Г.Ёндон "Толгойгоороо хариуцна" гэлээ.
21°C
Сэтгэгдэл (19)