Ш.Адьшаа гишүүн Уул уурхайн орлогыг Монгол дахь банкаар дамжуулдаг болох тогтоолын төсөл өргөн барилаа

УИХ-ын гишүүн Ш.Адьшаа Хянан шалгах түр хороо байгуулах тухай тогтоолын төслийг өргөн барилаа.

Өнгөрсөн жилээс эхлэн өнөөг хүртэл уул уурхайн бүтээгдэхүүний үнэ өсөж байгаа хэдий ч манай төрийн өмчит компаниудын борлуулалтын үнэ дэлхийн зах зээлийн үнээс 3 дахин бага байна. Түүнчлэн Монгол Улсын хилээр нэвтрэх тээврийн хэрэгслийн зардал хэт өссөн, үүнээс улбаалан өргөн хэрэглээний бараа бүтээгдэхүүний үнэ ч мөн өссөн шалтгаан нөхцлийг тогтоох шаардлагатай гэж хууль санаачлагч үзжээ. 

Энэ талаар тэрбээр хэлэхдээ "Уул уурхайн салбар гадаад зах зээл тэр дундаа дэлхийн түүхий эдийн зах зээлийн үнийн өсөлтөөс ихээхэн хамааралтай болсон. Энэхүү онцлогийг харгалзан түүхий эдийн экспорт давамгайлсан манай улсын хувьд уул уурхайн салбарын хөрөнгийг Монгол дахь банкаар дамжуулах, бизнесийн таатай орчин бүрдүүлэх нь манай улс гадаад валютын нөөцөө нэмэгдүүлэн үүсээд буй эдийн засгийн хямралыг даван туулахад дөхөм болох юм.

 Иймд уул уурхайн компаниудын нүүрсний олборлолт, экспортоос олсон ашгийг  Монгол Улсын валютын нөөцийг нэмэгдүүлэхээр ашиглах төрийн урт хугацааны хөгжлийн бодлогод тулгуурлаж, газрын хэвлийн баялгийн үр өгөөжийг нэмэгдүүлэх, улмаар тогтвортой олон тулгуурт эдийн засгийн бүтцийг бий болгох, уул уурхайн салбарт хэрэгжиж буй хууль, тогтоомжийн хэрэгжилтэд хяналт тавих, тус салбараас Монгол Улсын хүртэж буй орлогын урсгалыг хянах, хилийн боомтуудаар ачаа, тээвэр, нүүрс нэвтрүүлэх болон чөлөөт бүсийн үйл ажиллагаанд учирч буй хүндрэлийн шалтгаан нөхцлийг олж тогтоох, хянан шалгах, улмаар уг хүндрэлийг  даван туулах арга замыг тодорхойлох практик болоод хууль зүйн шаардлагын хүрээнд хянан шалгах,  түр хороо байгуулах талаар тогтоолын төслийг боловсрууллаа" гэв.