Шинэ сайд нараас хамгийн их хөрөнгөтэй нь Н.Учрал бол удаах нь Ж.Ганбаатар

Ерөнхий сайд Л.Оюун-Эрдэнийн танхимд ажиллах шинэ сайд нар өнөөдөр тангаргаа өргөж ажилдаа орлоо. Үндсэн хуулийн нэмэлт өөрчлөлтийн хүрээнд давхар дээлтэй 10 орчим сайд шинээр томилогдож Монгол улсын түүхэнд хамгийн олон сайдтай танхим бүрдээд байна.

Тэгвэл шинэ сайд нар АТГ-т хөрөнгө орлогоо дараах байдлаар мэдүүлж байжээ. Шинэ сайд нараас хамгийн их хөрөнгө орлоготой  Цахим хөгжил харилцаа холбооны сайд Н.Учрал бөгөөд өөрийн орлогоо 803 сая гэж мэдүүлсэн байна. Харин түүний гэр бүлийн орлого 196 сая төгрөг бол, 3,5 тэрбумын гурван орон сууцтай. Мөн 680 сая төгрөгийн дөрвөн машинтай гэж мэдүүлжээ.

Харин хөрөнгө, орлогоороо удаалж байгаа шинэ сайд бол Уул уурхай, хүнд үйлдвэрийн сайд Ж.Ганбаатар. Тэрээр өөрийн орлогоо 187 сая төгрөг, гэр бүлийн орлого 384 сая гэж мэдүүлсэн байна. 1.1 тэрбумын үнэ бүхий гурван орон сууцтай. 530 сая төгрөгийн 3 машинтай гэжээ.

Түүний дараа Хүнс, хөдөө аж ахуйн сайдаар томилогдсон Х.Болорчулуун орж байна. Тэрээр өөрийн орлогоо 58 сая төгрөг, гэр бүлийн орлого 295 сая төгрөг хэмээн мэдүүлжээ. Харин гурван автомашинтай гэсэн байна.

Ингээд давхар дээлтэй шинэ сайд нарын ХОМ-ийг товч хүргэе.

Нийслэл хот, түгжрэлийг бууруулах асуудал хариуцсан сайд Ж.Сүхбаатар  өөрийн орлого 49 сая гэр бүлийн орлого 75 сая төгрөг

Спорт, олимпизм хариуцсан сайд Б.Бат-Эрдэнэ өөрийн орлого 45 сая 770 мянга, гэр бүлийн орлого 21 сая 854 мянган төгрөг

Зам тээврийн хөгжлийн сайд С.Бямбацогт өөрийн орлого 43 сая, гэр бүлийн орлого 501 сая төгрөг

Эрчим хүчний сайд Б.Чойжилсүрэн өөрийн орлого 43 сая, гэр бүлийн орлого 71 сая төгрөг гэж 2021 онд АТГ-т өгсөн Хөрөнгө орлогын мэдүүлэгтээ тусгажээ.

Хөдөлмөр нийгмийн хамгааллын сайд Д.Сарангэрэл өөрийн орлого 39 сая төгрөг, гэр бүлийн орлого гурван тэрбум 119 сая төгрөг

Эдийн засаг, хөгжлийн сайд Ч.Хүрэлбаатар өөрийн орлого 42 сая 378 мянга, гэр бүлийн орлого 115 сая 531 мянга