Улаанбаатар Төмөр зам нийтдээ 84 өртөө зөрлөгтэй. Үүнээс 39 өртөө зөрлөг нь ачилт буулгалт хийдэг байна. Тэгвэл дээрх өртөө зөрлөг бүрээр тээвэрлэгдэх ачааны хуваарилалтыг өртөөний дарга нар хийсээр иржээ. Гэвч энэ нь цар тахлаас үүдэлтэй ачаа тээврийн саатал, бөөгнөрөл үүссэн өнгөрсөн хоёр жилд хурган дарга нар дунд авлига цэцэглэх гол шалтгаан болсон байна.
Он гарснаас хойш өнөөдрийг хүртэл УБТЗ-аар 71 сая тонн ачаа тээвэрлүүлэх хүсэлт иржээ. Гэвч үүний ердөө 14 сая тонныг төмөр замаар тээвэрлэх хүчин чадалтай. Өөрөөр бол УБТЗ өөрийн хүчин чадлаас 5 дахин их ачаа тээвэрлэх хүсэлт авсан байна. Үүнийг шийдвэрлэхийн тулд хэл ам гарахаас эхлээд авлига өгөх, авах олон асуудал төмөр замд байгааг зам тээврийн, хөгжлийн сайд С. Бямбацогт хэвлэлд өгсөн ярилцлагадаа онцолж байсан юм.
Олон улсад ачаа тээврийн хуваарилалтыг цахимаар хийж хянадаг бол манай улсад өртөөний дарга нар хийдэг. Ачаа хуваарилах нэрээр авлига авсан хэд хэдэн өртөөний даргын хэрэг ч АТГ-т шалгагдсан гэдгийг эх сурвалж хэллээ.
Энгийн иргэдийн ачаа тээврийг хойш тавьж эрх мэдэлтэй, нөлөө бүхий хүмүүсээс авлига аван ачааны хуваарилалт хийдэг өртөөний дарга нарын асуудал үнэ өсгөх нэг том шалтгаан болж байгааг анхаарах цаг болсон байна.
Сэтгэгдэл (0)
Сэтгэгдэл бичигдээгүй байна