Архангай аймагт хөдөлгөөн хязгаарлалаа

Өчигдөр буюу аравдугаар сарын 7-ны өдөр Архангай, Өвөрхангай, Дундговийн хойд, Булган, Орхон, Төв аймгийн өмнөд хэсгээр цасан шуурга шуурна хэмээн Ус цаг, орчны шинжилгээний хүрээлэнгээс анхааруулсан. Тэгвэл Архангай аймгийн нутаг дэвсгэрт их хэмжээний цас орсон тул тээврийн хэрэгслийн хөдөлгөөнийг хязгаарлалаа. Замын хөдөлгөөний аюулгүй байдлыг хангах, иргэдийг аюул, ослоос урьдчилан сэргийлэх зорилгоор тээврийн хэрэгслийн хөдөлгөөнийг өчигдрийн /2022.10.07/ 14.00 цагаас эхлэн хязгаарлахаар Архангай аймгийн засаг даргын захирамж гарсан байна. Тиймээс Архангай аймаг, Цагаан даваагаар дайран өнгөрөх хот хоорондын зорчигч тээврийн хөдөлгөөнийг түр хязгаарлажээ.