Засгийн газраас төрийн цахим шилжилттэй холбоотойгоор авч хэрэгжүүлж буй арга хэмжээний хүрээнд гамшгийн үед үндсэн төвийн үзүүлж буй нэн чухал төрийн цахим үйлчилгээний дэд бүтцийг нөхөн ажиллах, найдвартай ажиллагааг хангах үүрэг бүхий “Үндэсний дата төв”-ийн Нөөц төвийг Дархан-Уул аймагт байгууллаа. Ингэснээр манай улсын цахим хөгжлийн үзүүлэлтийг нэг шатаар ахиулж, төрийн цахим шилжилтийн суурь, дэд бүтцийн тасалдалгүй ажиллагааг хангахуйц техник технологийн тусгай нөхцөл бүрдэх юм. Тус төв нь Олон Улсын стандартын “TIER III” шаардлагын дагуу үндсэн төвөөс 200 км-ээс хол зайд Дархан-Уул аймагт байрлаж байгаа юм.
Үндэсний дата төвийн нөөц төв байгуулагдсанаар байгалийн давтагдашгүй хүчин зүйлийн үед нийтийн мэдээллийн суурь болон төрөлжсөн мэдээллийн сан, төрийн үндсэн болон дэмжих системийн нөөцлөлтийг хийж, мэдээллийг нөхөн сэргээх боломжтой болно. Түүнчлэн улсын хэмжээнд үйл ажиллагаа явуулж буй цахим систем, цахим үйлчилгээ, цаашлаад иргэн бүрийн цахим мэдээллийн бүрэн бүтэн, хүртээмжтэй байдал дээшилнэ гэж үзэж байна.
ҮНДЭСНИЙ ДАТА ТӨВИЙН НӨӨЦ ТӨВ ТӨРИЙН ЦАХИМ ҮЙЛЧИЛГЭЭНИЙ НАЙДВАРТАЙ АЖИЛЛАГААГ ХАНГАНА
Үндэсний дата төвийн Нөөц төвийг байгуулах төслийг Дэлхийн банкны группийн Олон Улсын Хөгжлийн Ассоциацийн хөнгөлөлттэй зээлийн санхүүжилтээр хэрэгжсэн. Төсөл нь 2 үндсэн бүтэцтэйгээр хэрэгжсэн. Эхний шатанд Нөөц төвийг байгуулах, ашиглалтад оруулах төслийн техникийн нарийвчилсан тодорхойлолт, дизайн зураглал болон тендерийн баримт бичгийг боловсруулах Зөвлөх багийг сонгох байсан бөгөөд тус зөвлөх баг нь техникийн холбогдох баримт бичгүүдийг боловсруулахаас гадна нийлүүлэлт, суурилуулалтад хяналт тавих, олон улсын жишигт нийцсэн зөвлөх үйлчилгээг мөн үзүүлсэн юм.
Сэтгэгдэл (0)
Сэтгэгдэл бичигдээгүй байна